Accident News: ओडिशा : ओडिशा राज्यात भरधाव ट्रकने पोलिसांच्या बोलेरो वाहनाला धडक दिल्याने भीषण अपघात (Accident) झाला आहे. या अपघातात पाच पोलिसांचा (5 Police Death) जागीच मृत्यू झाला असून तिघेजण गंभीर जखमी झाले आहेत. हा अपघात इतका भयंकर होता की धडकेनंतर पोलिसांच्या वाहनाचे मोठे नुकसान झाले. ही घटना झारसुगुडा पोलीस ठाण्याजवळ पहाटेच्या सुमारास घडली असल्याची माहिती पोलिसांनी दिली आहे.
मृत्यू झालेल्या पोलिसांमध्ये ड्रिल सब इन्स्पेक्टर निरंजन कुजूर, एपीआर कर्मचारी काशीराम भोईर, देवदत्त सा, एपीआर हवालदार लिंगराज धुरुआ आणि होमगार्ड भक्तबंधु मिर्धा यांचा समावेश आहे. हे सर्वजण कर्तव्यावर असताना हा अपघात झाला. या घटनेमुळे पोलीस दलात शोककळा पसरली आहे.
या अपघातात तिघेजण गंभीर जखमी झाले असून त्यात दोन एपीआर कर्मचारी आणि एका सार्जंटचा समावेश आहे. अपघातानंतर स्थानिक नागरिकांनी तातडीने मदत करत जखमींना वाहनातून बाहेर काढले. त्यानंतर त्यांना जवळच्या रुग्णालयात दाखल करण्यात आले. सध्या जखमींवर तज्ज्ञ डॉक्टरांच्या देखरेखीखाली उपचार सुरू असून त्यांची प्रकृती चिंताजनक असल्याचे सांगण्यात आले आहे.
घटनेची माहिती मिळताच वरिष्ठ पोलीस अधिकारी तातडीने घटनास्थळी पोहोचले आणि परिस्थितीचा आढावा घेतला. पोलिसांनी अपघाताला कारणीभूत ठरलेल्या ट्रक चालकाला ताब्यात घेतले असून त्याची चौकशी सुरू आहे. हा अपघात नेमका कशामुळे झाला, याचा तपास केला जात आहे.
पहाटेच्या वेळी चालकाला डुलकी लागली होती का किंवा वाहनात काही तांत्रिक बिघाड झाला होता का, याबाबत पोलिसांकडून तपास सुरू आहे. या घटनेमुळे परिसरात हळहळ व्यक्त केली जात असून, मृत पोलिसांच्या कुटुंबीयांवर दुःखाचा डोंगर कोसळला आहे.
