उत्तर प्रदेश: उत्तर प्रदेशातील मेरठ जिल्ह्यात घडलेल्या एका धक्कादायक घटनेत 28 वर्षीय बॉडीबिल्डर सलमानचा स्वतःवरच वार केल्यामुळे मृत्यू झाला आहे. एका क्षणिक संतापातून घेतलेल्या निर्णयाने त्याचे आयुष्य संपुष्टात आले आणि कुटुंबावर दुःखाचा डोंगर कोसळला. (Latest Marathi News)
मिळालेल्या माहितीनुसार, सलमान हा इंचौली परिसरात राहत होता आणि त्याचा पोल्ट्री फार्म व्यवसाय होता. त्याचबरोबर तो स्थानिक स्तरावर प्रसिद्ध शरीरसौष्ठवपटू म्हणून ओळखला जात होता. गुरुवारी सकाळी त्याचे मोठा भाऊ इम्रान याच्यासोबत फोनवर वाद झाला. हा वाद इतका तीव्र झाला की संतापाच्या भरात सलमानने घरातील चाकू उचलून स्वतःच्या मांडीवर वार केला.
हा वार अत्यंत घातक ठरला. वैद्यकीय तज्ज्ञांच्या मते, मांडीतील फेमोरल आर्टरी ही शरीरातील प्रमुख रक्तवाहिन्यांपैकी एक असून ती कापल्यास काही मिनिटांत मोठ्या प्रमाणात रक्तस्राव होतो. सलमानच्या बाबतीतही तसेच झाले. त्याची शरीरयष्टी अतिशय सडपातळ आणि ‘लो फॅट’ असल्याने जखम अधिक खोलवर गेली आणि रक्तस्राव नियंत्रणात आणणे कठीण झाले.
कुटुंबीयांनी त्याला तातडीने रुग्णालयात नेले, मात्र अतिरक्तस्रावामुळे डॉक्टरांना त्याला वाचवता आले नाही. सलमानचे लग्नाला 4 वर्षे झाली होती आणि त्याला दोन लहान मुले आहेत. त्याच्या अचानक मृत्यूमुळे कुटुंब पूर्णपणे हादरले आहे.
पोलिसांच्या प्राथमिक तपासानुसार हे आत्महत्येसारखे प्रकरण वाटत असले, तरी कुटुंबीयांनी कोणतीही तक्रार दाखल केली नाही. त्यामुळे पुढील तपास मर्यादित स्वरूपात सुरू आहे.
