मुंबई: वंचित बहुजन आघाडीचा औपचारिकरित्या महाविकास आघाडीत समावेश करण्यात आला आहे. याबाबतचे महाविकास आघाडीने अधिकृत पत्र प्रसिद्ध केले आहे. काही दिवसांपासून वंचित बहुजन आघाडीचा महाविकास आघाडीत समावेश होणार की नाही याच्या उलटसुलट चर्चा रंगल्या होत्या. गेल्या गुरुवारी झालेल्या बैठकीत मानापमान नाट्यही रंगलं होते. त्यानंतर मंगळवारी वंचितच्या प्रतिनिधींना बाहेर तासभर बसवल्याने महाविकास आघाडीने अपमान केल्याचा आरोपही वंचिततर्फे करण्यात आला होता. मात्र, अखेर आज वंचितला महाविकास आघाडीत समावेश करत असल्याचे पत्र दिले आहे.
मंगळवारी झालेल्या मुंबईतील महाविकास आघाडीच्या बैठकीमध्ये वंचित बहुजन आघाडीचे प्रतिनिधी सहभागी झाले होते. वंचित बहुजन आघाडीने महाविकास आघाडीत सामील व्हावे, यावर शिवसेना, काँग्रेस आणि राष्ट्रवादी काँग्रेसचे एकमत झाले असून वंचित बहुजन आघाडीचा महाविकास आघाडीत समावेश केला असल्याचं या पत्रात म्हटले आहे.
महाविकास आघाडीची पुढची बैठक ही 2 फेब्रुवारी रोजी आयोजित करण्यात आली आहे. त्यावेळी वंचितच्या वतीने प्रमुख डॉ. प्रकाश आंबेडकर हे स्वतः त्यासाठी हजर राहणार आहेत. दरम्यान वंचितला महाविकास आघाडीमध्ये समाविष्ट करण्यासंदर्भात अधिकृत पत्र जारी करण्यात आलं आहे. त्यावर प्रतिक्रिया देताना डॉ. प्रकाश आंबेडकर यांनी आपल्याला अद्याप अधिकृत पत्र प्राप्त झाले नाही, ते मिळाल्यावर भूमिका मांडू, असे त्यांनी म्हटले.
मुंबईतील बैठकीत वंचित महाविकास आघाडीमध्ये सहभागी होणार की नाही? याकडे सर्वांचं लक्ष लागले होते. प्रकाश आंबेडकरांनी बैठकीचे आमंत्रण आल्याचे जाहीर केले होते. वंचितच्या वतीने बैठकीसाठी प्रदेश उपाध्यक्ष डॉ. धैर्यवर्धन पुंडकर उपस्थित होते. त्यांच्याशिवाय शिवसेना ठाकरे गटाचे संजय राऊत, विनायक राऊत, राष्ट्रवादीचे जितेंद्र आव्हाड, जयंत पाटील, अनिल देशमुख आणि काँग्रेसकडून बाळासाहेब थोरात, अशोक चव्हाण, नाना पटोलेंसह वर्षा गायकवाड उपस्थित होत्या.
मा. @Prksh_Ambedkar जी, pic.twitter.com/jCa5PFqWdj
— Jayant Patil- जयंत पाटील (@Jayant_R_Patil) January 30, 2024
