मुंबई: अदानी उद्योग समुहाकडून होणाऱ्या धारावीच्या पुनर्विकास प्रकल्पाविरोधात शनिवारी उद्धव ठाकरेंच्या नेतृत्वाखाली महामोर्चाचे आयोजन केले होते. या मोर्चामध्ये शिवसैनिकांसह महाविकास आघाडी आणि इतर पक्षांचे कार्यकर्ते मोठ्या संख्येने सहभागी झाले होते. दरम्यान, हा मोर्चा संपल्यानंतर आयोजित करण्यात आलेल्या सभेमध्ये बोलताना उद्धव ठाकरे यांनी अदानी आणि सत्ताधारी भाजपा, शिवसेना शिंदे गटावर जोरदार टीका केली. ज्यांनी ज्यांनी अदानींची सुपारी घेतली आहे, त्यांनी आजच्या मोर्चातील हा अडकित्ता, खलबत्ता लक्षात घ्यावा. या खलबत्त्यात यांना असं चेचून काढू की, पुन्हा अदानींचं नाव काढणार नाही, असा इशाराच ठाकरे यांनी दिला.
उद्धव ठाकरे म्हणाले की, गेल्या अनेक वर्षांपासून धारावी प्रकल्प नुसता चर्चेत आहे. या प्रश्नासाठी अनेकजण आवाज उठवत आहेत. यात शिवसैनिकांचाही समावेश आहे. मी त्यांना आश्वासन दिलं होतं की, धारावीसाठी गरज पडली तर मुंबईच काय अख्या महाराष्ट्र उतरवेन. आज मुंबईतील आमचे मोजके कार्यकर्तेच रस्त्यावर आले आहेत. ज्यांनी ज्यांनी अदानींची सुपारी घेतली आहे. त्यांनी हा अडकित्ता लक्षात घ्यावा, हा अडकित्ता आहे. खलबत्ता आहे. त्यात चेचून काढू. पुन्हा अदानीचं नाव काढणार नाही, असे उद्धव ठाकरे यांनी म्हटले.
ते पुढे म्हणाले की, यांना पन्नास खोके कमी पडायला लागले. म्हणूनच आता हे बोके धारावी आणि मुंबई गिळायला निघाले आहे. यांची मस्ती वाढत चालली आहे. मध्यंतरी सरकार आपल्या दारीची चर्चा सुरू होती. मात्र हे सरकार अदानीच्या दारी उतरलं आहे, असा जोरदार टोलाही उद्धव ठाकरे यांनी लगावला.
