मुंबई: प्रधानमंत्री किसान सन्मान निधी योजना (PM-KISAN) अंतर्गत शेतकऱ्यांना दरवर्षी तीन हप्त्यांमध्ये 6,000 रुपये थेट त्यांच्या बँक खात्यात दिले जातात. याच योजनेचा 20 वा हप्ता जुलै 2025 च्या पहिल्या आठवड्यात जारी होण्याची शक्यता आहे. यापूर्वी 19 वा हप्ता 24 फेब्रुवारी 2025 रोजी वितरित करण्यात आला होता.
मात्र अद्याप अनेक शेतकऱ्यांचे मागील हप्ते प्रलंबित आहेत किंवा पुढील हप्ताही अडकण्याची शक्यता आहे. त्यामुळे योजनेचा लाभ वेळेत मिळावा यासाठी खालील चार महत्त्वाची कामे तातडीने पूर्ण करणे आवश्यक आहे.
ई-केवायसी (e-KYC) पूर्ण करणे अनिवार्य
PM-KISAN योजनेचा लाभ घेण्यासाठी ई-केवायसी आवश्यक आहे. शेतकरी [pmkisan.gov.in](http://pmkisan.gov.in) या अधिकृत वेबसाइटवर जाऊन स्वहस्ते e-KYC करू शकतात, किंवा जवळच्या कॉमन सर्व्हिस सेंटर (CSC) वर जाऊन बायोमेट्रिक पद्धतीने प्रक्रिया पूर्ण करता येते. ई-केवायसी न केल्यास हप्ता रोखला जाऊ शकतो.
शेतजमिनीची पडताळणी
शेतकऱ्यांच्या नावावर असलेली शेती भूसंपत्ती नोंदणी व पडताळणी प्रणालीमध्ये अचूक नोंदलेली असणे गरजेचे आहे. जमीन रेकॉर्डमध्ये चूक असल्यास तहसील कार्यालयात तात्काळ दुरुस्ती करून घ्यावी.
आधार-बँक खाते लिंकिंग
शेतकऱ्याचे बँक खाते आधार क्रमांकाशी लिंक असणे बंधनकारक आहे. अन्यथा DBT द्वारे रक्कम थेट खात्यात जमा होणार नाही. बँकेत जाऊन आधार लिंकिंग फॉर्म भरून प्रक्रिया पूर्ण करावी.
मोबाईल नंबर अपडेट करा
OTP तपासणीसाठी अचूक मोबाईल क्रमांक आवश्यक आहे. चुकीचा मोबाईल नंबर असल्यास व्यवहार अडकतो. [pmkisan.gov.in](http://pmkisan.gov.in) पोर्टलवर ‘Update Mobile Number’ या पर्यायाद्वारे सुधारणा करता येते.
तुमचं नाव यादीत आहे का?
‘Beneficiary Status’ पर्यायाद्वारे पोर्टलवरून आपले नाव, खाते क्रमांक व हप्त्याची स्थिती तपासता येते. नाव न आल्यास ग्रामसेवक, तलाठी किंवा कृषी अधिकारी यांच्याशी संपर्क साधावा.
20 वा हप्ता कधी येणार?
मिळालेल्या प्राथमिक माहितीनुसार, 18 जुलै रोजी पंतप्रधान नरेंद्र मोदी यांचा बिहारमध्ये मोठा कार्यक्रम होणार आहे. या कार्यक्रमातच 20 व्या हप्त्याचे वितरण होण्याची शक्यता आहे. हा हप्ता जूनमध्ये अपेक्षित होता, मात्र अद्याप तो रोखला गेला आहे.
कुठे संपर्क साधावा?
अधिकृत पोर्टल: [www.pmkisan.gov.in](http://www.pmkisan.gov.in)
टोल-फ्री हेल्पलाईन: 155261 , 1800-11-5526 , 011-23381092
