मुंबईः राष्ट्रवादी काँग्रेसच्या आमदार अपात्रता प्रकरणाच्या सुनावणीचे वेळापत्रक जाहीर झाले आहे. वेळापत्रकानुसार २५ आणि २७ जानेवारीपर्यंत राष्ट्रवादीच्या दोन्ही गटांचे अंतिम युक्तीवाद संपन्न होतील. त्यानंतर लगेच निर्णय जाहीर होण्याची शक्यता आहे.
२ जुलै 2023 रोजी अजित पवारांनी राष्ट्रवादी काँग्रेस पक्षातल्या आमदारांना सोबत घेऊन मंत्रिपदाची शपथ घेतली. राष्ट्रवादीचे चाळीसपेक्षा जास्त आमदार शरद पवारांची साथ सोडून अजित पावारांसोबत गेले. त्यामुळे आता त्यांच्या अपात्रतेवर महिनाभरात अंतिम निर्णय होणार आहे.
अजित पवारांसह महायुतीत गेलेले अजित पवार गटाचे ९ आमदार मंत्री झाले. त्यामुळे शरद पवार गटाकडून विधानसभा अध्यक्षांकडे आमदार अपात्रता प्रकरणासाठी याचिक दाखल करण्यात आली. या याचिकेवर सुनावणीसाठी १२ दिवसांचे वेळापत्रक निश्चित करण्यात आले आहे. त्याबाबतचे राष्ट्रवादी आमदार अपात्रता सुनावणीचे वेळापत्रक खाली दिले आहे.
६ जानेवारी – राष्ट्रवादीच्या दोन्ही गटांमध्ये याचिका आणि त्यावरील उत्तराची कागदपत्रे एकमेकांना सोपविली जातील.
८ जानेवारी – याचिकेसाठी अधिकची, अतिरिक्त माहिती जोडण्यासाठी वेळ.
९ जानेवारी – फाईल्स, अतिरिक्त कागदपत्रे पटलावर ठेवणार. ऐनवेळी नवी कागदपत्रे जोडता येतील.
११ जानेवारी – याचिकेशी संबंधित कागदपत्रांची पाहणी आणि पडताळणी. कागदपत्रांची पडताळणीचा पहिला दिवस. पहिल्या दिवशी शरद पवार गट अजित पवार गटाकडून सादर झालेली कागदपत्रे तपासेल.
१२ जानेवारी – याचिकेशी संबंधित कागदपत्रांची पाहणी आणि पडताळणीचा दुसरा दिवस. अजित पवार गटाकडून शरद पवार गटाने सादर केलेल्या कागदपत्रांची पाहणी केली जाईल.
१४ जानेवारी – सुनावणीच्या कामकाजात कागदपत्रांचा समावेश करण्यासाठी किंवा एखादे वगळण्यासाठी अर्ज दाखल करण्याचा दिवस.
१६ जानेवारी – विधानसभा अध्यक्ष नार्वेकरांसमोर पहिली प्रत्यक्ष सुनावणी. सुनावणीचे विषय नक्की केले जातील.
१८ जानेवारी – प्रतिज्ञापत्र सादर करण्याचा दिवस.
२० जानेवारी – अजित पवार गटाच्या साक्षीदारांच्या उलटतपासणी होईल.
२३ जानेवारी – शरद पवार गटाच्या साक्षीदारांच्या उलटतपासणी होईल.
२५ आणि २७ जानेवारी – राष्ट्रवादी काँग्रेसच्या दोन्ही गटांचे अंतिम युक्तीवाद संपन्न होतील.
