मुंबई : मराठा आरक्षणाच्या लढ्याला अखेर मोठं यश आलं आहे. आंदोलनकर्ते मनोज जरांगे पाटील यांच्या सर्व मागण्या राज्य सरकारने मान्य केल्या आहेत. या निर्णयानंतर मराठा आरक्षणविरोधी याचिकाकर्ते वकील गुणरत्न सदावर्ते यांनी जोरदार हल्लाबोल करत पुन्हा न्यायालयात जाण्याचा थेट इशारा दिला आहे. हिंदुस्थानातील खुल्या वर्गातील जनतेवर अन्याय होणार नाही, ही माझी जबाबदारी आहे. त्यामुळे लवकरात लवकर आम्ही न्यायालयाचं दार ठोठावू, असं गुणरत्न सदावर्तें म्हणाले आहेत.
याबाबत बोलताना गुणरत्न सदावर्ते म्हणाले की, खुल्या वर्गातील ब्राम्हण, वैश्य, जैन, मागासवर्गीयांमधील गुणवंत असतील यांच्या अधिकाऱ्यांच्या जागा शाबुत ठेवणं, त्यावर गदा येऊ न देणं, त्यासोबतच खऱ्या मागासवर्गीय जाती आहेत, त्यांची गुणवत्ता एका विशिष्ट स्तरावर आणणं, याची जबाबदारी आमच्यावर आहे.
तसेच सगेसोयरे यांबाबत जे बोललं गेलं, ते आधीपासून कायद्यात अंतर्भूत आहेत. कुणीही या गोष्टीला विजयोत्सव म्हणू नये, जरांगेंकडून ही दिशाभूल केली जाणारी बाब. वेगवेगळे स्टंट केले जातात, त्यांपैकी हा एक पॉलिटीकल स्टंट. कायद्यात हे प्रकरण टिकू शकत नाही, डंके की चोट पर… कोणतीही बॅक डोअर एन्ट्री हा प्रकार कायद्याच्या संहितेत नाही, अशी तरतुद कायद्यात नाही. कुणबींना मागास कुणबी नाही, हे स्पष्टपणे सांगितलं गेलं आहे. आजच्या प्रकारच्या नोटिसेस दिल्या जाऊ शकतात, मात्र कायद्यानुसार आरक्षण टिकू शकत नाही.”, असं गुणरत्न सदावर्ते म्हणाले आहेत.
काय म्हणालेत सदावर्ते?
मनोज जरांगे याचं आंदोलन हा एक स्टंट आहे. जरांगेंचा अभ्यास काय? ते कोणत्या कॉलेजमधून लॉ पास झालेत, कोणत्या विषयात डॉक्टरेट केली आहे. मराठ्यांना ईडब्लूएसपासून वंचित ठेवण्यासाठी हे आंदोलन होतं. या आरक्षणाला कायद्यातून तरतूद नाही. कायद्यात कुठलीही अशी बॅक डोअर एन्ट्री नाही, असे म्हणत लवकरच न्यायालयाचे दार ठोठावणार, असा इशारा गुणरत्न सदावर्ते यांनी दिला आहे. तसेच कुणबींना मागास कुणबी नाही, हे स्पष्टपणे सांगितलं गेलं आहे. अशा प्रकारच्या नोटिसेस दिल्या जाऊ शकतात, मात्र कायद्यानुसार आरक्षण टिकू शकत नाही. असंही गुणरत्न सदावर्ते म्हणाले आहेत.
