मुंबई: नाशिकमधील भोंदूबाबा अशोक खरात (Ashok Kharat) प्रकरणामुळे राज्यात राजकीय आरोप-प्रत्यारोपांचा भडका उडाला असताना, आता मराठा आंदोलक मनोज जरांगे पाटील (Manoj Jarange Patil) यांचा खरातसोबतचा एक फोटो समोर आल्यानंतर वाद अधिकच चिघळला आहे. या पार्श्वभूमीवर ओबीसी नेते लक्ष्मण हाके (Lakshman Hake) यांनी तीव्र प्रतिक्रिया देत थेट जरांगे पाटील यांना सवाल केले आहेत. (Maharashtra Politics)
लक्ष्मण हाके यांनी स्पष्ट शब्दांत म्हटले की, “एखादा गुन्हेगार समोर आला की त्याची जात काढून टीका करणारे काही नेते आता गप्प का आहेत?” त्यांनी थेट मनोज जरांगे पाटील यांच्यावर निशाणा साधत विचारले की, “प्रत्येक विषयावर भूमिका घेणारे जरांगे पाटील आता अशोक खरात प्रकरणात का बोलत नाहीत? त्यांनी या गंभीर प्रकरणावर मौन का बाळगले आहे?”
हाके यांनी या प्रकरणात दुहेरी भूमिका घेतल्याचा आरोप करत सांगितले की, समाजात गुन्हेगाराचे समर्थन कोणतीही जात करत नाही. मात्र, पूर्वी अशा घटनांमध्ये जातीय मुद्दे उचलणारे नेते आता शांत का आहेत, याचे उत्तर त्यांनी द्यावे.
याचबरोबर हाके यांनी मुख्यमंत्री देवेंद्र फडणवीस यांनाही थेट आवाहन केले. त्यांनी मागणी केली की, “अशोक खरातची जात स्पष्ट करावी, कारण आडनावावरून समाजात गैरसमज आणि जातीय तेढ निर्माण होऊ शकतो.” तसेच खरात प्रकरणात कठोर कारवाई करावी आणि ज्यांचे त्याच्यासोबत फोटो समोर आले आहेत, त्यांचीही चौकशी करून आवश्यक ती कारवाई करावी, अशी मागणी त्यांनी केली.
या वक्तव्यांमुळे प्रकरणाला आता स्पष्टपणे राजकीय रंग चढला असून, फोटो व्हायरल होणे आणि त्यावरून सुरू झालेली टीका-प्रतिक्रिया यामुळे राज्यातील राजकारणात नवे वादंग निर्माण होण्याची शक्यता आहे.
