मुंबई: काँग्रेसचे प्रदेशाध्यक्ष हर्षवर्धन सपकाळ यांनी टिपू सुलतान यांची (Maharashtra Politics) तुलना छत्रपती शिवाजी महाराज यांच्यासोबत केल्याच्या वक्तव्यामुळे राज्याच्या राजकारणात (Harshwardhan Sapkal) नवा वाद पेटला आहे. या विधानानंतर विविध राजकीय पक्ष, हिंदुत्ववादी संघटना आणि शिवप्रेमींकडून तीव्र प्रतिक्रिया उमटत असून सपकाळ यांच्या अडचणी वाढण्याची चिन्हे दिसत आहेत. (Raj Thackeray)
वादाची सुरुवात मालेगाव महापालिकेतील उपमहापौरांच्या दालनात टिपू सुलतान यांचा फोटो लावण्यात आल्याने झाली. हिंदुत्ववादी संघटनांनी आक्षेप घेतल्यानंतर तो फोटो हटवण्यात आला. त्यानंतर या संदर्भात प्रतिक्रिया देताना सपकाळ यांनी “ज्याप्रमाणे शिवाजी महाराजांनी शौर्य आणि स्वराज्याचा विचार दिला, त्याचप्रमाणे टिपू सुलतान यांनीही काम केले,” असे विधान केले. याच वक्तव्यामुळे राजकीय वातावरण तापले.
महाराष्ट्र नवनिर्माण सेना यांनी या विधानाचा तीव्र निषेध नोंदवत सपकाळ यांनी महाराष्ट्राची आणि शिवप्रेमींची जाहीर माफी मागावी, अशी मागणी केली आहे. भाजप आणि शिवसेनेच्या नेत्यांनीही सपकाळ यांच्यावर जोरदार टीका केली. प्रकरण इतके चिघळले की पुण्यातील पर्वती पोलीस ठाण्यात त्यांच्या विरोधात गुन्हा दाखल करण्यात आला आहे.
दरम्यान, सपकाळ यांनी सोशल मीडियावर स्पष्टीकरण देत आपले वक्तव्य संदर्भाबाहेर नेण्यात आल्याचा आरोप केला आहे. मुख्यमंत्री देवेंद्र फडणवीस यांच्यावर राज्यात तणाव निर्माण करण्याचा आरोप करत त्यांनी आपल्या विधानाची “मोडतोड” झाल्याचे म्हटले आहे.
हा वाद केवळ दोन ऐतिहासिक व्यक्तिमत्त्वांच्या तुलनेपुरता मर्यादित नसून महाराष्ट्रातील भावनिक आणि राजकीय समीकरणांशी जोडलेला आहे. शिवाजी महाराज हे महाराष्ट्राचे आराध्य दैवत मानले जात असल्याने अशा तुलनांमुळे सामाजिक तणाव निर्माण होण्याची शक्यता असते. त्यामुळे पुढील काही दिवसांत या प्रकरणाचे राजकीय पडसाद अधिक तीव्र होण्याची शक्यता नाकारता येत नाही.
