मुंबई: 31 डिसेंबर रोजी देशभरातील गिग (Gig Workers Strike) वर्कर्सनी संपाचा इशारा दिला असून, याचा थेट परिणाम फूड डिलिव्हरी आणि ई-कॉमर्स सेवांवर होण्याची शक्यता आहे. त्यामुळे नववर्षाच्या पूर्वसंध्येला ऑनलाइन ऑर्डर देण्याचा विचार करणाऱ्या ग्राहकांनी आधीच पर्यायी योजना आखाव्यात, असे आवाहन गिग वर्कर्स संघटनांकडून करण्यात आले आहे. हा संप 31 डिसेंबर 2025 रोजी देशव्यापी स्वरूपात होणार असल्याचा इशारा देण्यात आला आहे. (Latest Marathi News)
फूड डिलिव्हरी, किराणा सामान, औषधे तसेच ई-कॉमर्स प्लॅटफॉर्मवर काम करणारे डिलिव्हरी बॉय, ड्रायव्हर्स आणि इतर गिग वर्कर्स या संपात सहभागी होणार आहेत. कामाच्या अनिश्चित वेळा, कमी मानधन, विमा संरक्षणाचा अभाव, अपघातांमध्ये मदत न मिळणे आणि कोणतीही सामाजिक सुरक्षा नसणे या प्रमुख मागण्यांसाठी हा संप पुकारण्यात आला आहे. अनेक गिग वर्कर्स दीर्घ वेळ काम करूनही अपेक्षित उत्पन्न मिळत नसल्याची तक्रार करत आहेत.
संघटनांच्या माहितीनुसार, सणासुदीच्या काळात आणि वर्षाच्या शेवटच्या दिवशी डिलिव्हरीवर मोठ्या प्रमाणात अवलंबून असलेल्या ग्राहकांना या संपाचा फटका बसू शकतो. अन्नपदार्थांची डिलिव्हरी उशिरा होणे, काही भागांत सेवा पूर्णपणे बंद राहणे किंवा ऑर्डर स्वीकारण्यात अडचणी येण्याची शक्यता व्यक्त करण्यात आली आहे. त्यामुळे घरगुती कार्यक्रम, पार्टी किंवा नववर्ष साजरे करण्यासाठी ऑनलाइन सेवांवर अवलंबून असलेल्या नागरिकांनी आधीच आवश्यक वस्तूंची व्यवस्था करून ठेवावी, असा सल्ला देण्यात आला आहे.
दरम्यान, संबंधित कंपन्यांकडून अद्याप अधिकृत प्रतिक्रिया देण्यात आलेली नाही. मात्र, परिस्थिती नियंत्रणात ठेवण्यासाठी पर्यायी व्यवस्था करण्याचा प्रयत्न केला जाऊ शकतो, अशी शक्यता वर्तवली जात आहे. गिग वर्कर्सच्या मागण्यांकडे सरकार आणि कंपन्यांनी गांभीर्याने पाहावे, अन्यथा भविष्यात असे आंदोलन अधिक तीव्र होऊ शकते, असा इशाराही संघटनांकडून देण्यात आला आहे.
