मुंबई : राष्ट्रवादी काँग्रेस शरदचंद्र पवार पक्षाचे अध्यक्ष शरद पवार यांची प्रकृती बिघडल्याने त्यांना मुंबईतील ब्रीच कँडी रुग्णालयात उपचारासाठी दाखल करण्यात आले आहे. राज्यातील दुष्काळी भागाच्या दौऱ्यावर असताना त्यांना कफ आणि अशक्तपणाचा त्रास जाणवू लागला होता. त्यानंतर त्यांना पुण्यातील रुबी हॉल क्लिनिकमध्ये दाखल करण्यात आले होते. दोन दिवसांच्या उपचारांनंतर त्यांना डिस्चार्ज देण्यात आला. पुढील वैद्यकीय तपासण्यांसाठी त्यांना मुंबईतील ब्रीच कँडी रुग्णालयात नेण्यात आले आहे.
शरद पवार यांच्या प्रकृतीची विचारपूस करण्यासाठी विविध राजकीय पक्षांतील नेते रुग्णालयात भेट देत आहेत. राज्याचे उपमुख्यमंत्री एकनाथ शिंदे यांनीही ब्रीच कँडी रुग्णालयात जाऊन शरद पवार यांची भेट घेतली. यावेळी शिवसेनेचे नेते सचिन अहिर आणि मिलिंद देवरा हेही उपस्थित होते.
शरद पवार यांच्या भेटीनंतर एकनाथ शिंदे यांनी माध्यमांशी संवाद साधला. ते म्हणाले, “मी नुकतीच पवारसाहेबांची भेट घेतली. त्यांची प्रकृती उत्तम असून सुधारणा होत आहे. उद्या साहेबांना डिस्चार्ज मिळेल. पवारसाहेब मोठे नेते आहेत. भेटीदरम्यान राज्यातील दुष्काळ आणि त्यावरील उपाययोजनांबाबत चर्चा झाली. त्यांनी डिस्चार्जसाठी घाई न करता विश्रांती घ्यावी, असे मी त्यांना सांगितले. डॉक्टरांनीही त्यांची प्रकृती उत्तम असल्याचे सांगितले आहे.”
दरम्यान, एकनाथ शिंदे यांचा रुग्णालयातील दौरा पूर्वनियोजित नव्हता, अशी माहिती आहे. मुख्यमंत्री देवेंद्र फडणवीस हेही नियोजित कार्यक्रम पूर्ण झाल्यानंतर शरद पवार यांची भेट घेण्याची शक्यता व्यक्त करण्यात आली. मुख्यमंत्र्यांनी खासदार सुप्रिया सुळे यांना फोन करून शरद पवार यांच्या प्रकृतीची विचारपूस केल्याची माहिती आहे.
शरद पवार यांची प्रकृती जाणून घेण्यासाठी गुरुवारी, ५ नोव्हेंबर रोजी राष्ट्रवादी काँग्रेसचे नेते आणि खासदार प्रफुल्ल पटेल यांनी रुग्णालयात जाऊन त्यांची भेट घेतली. यावेळी दोन्ही नेत्यांमध्ये विविध विषयांवर चर्चा झाली. मंत्री छगन भुजबळ, उपमुख्यमंत्री सुनेत्रा पवार, काँग्रेस नेते बाळासाहेब थोरात, शिवसेना ठाकरे गटाचे खासदार संजय राऊत आणि शेकापचे जयंत पाटील यांनीही शरद पवार यांची भेट घेतली.
संजय राऊत यांनी भेटीदरम्यान शरद पवार यांना आपले ‘बोध कीर्तन’ हे पुस्तक भेट दिले. राष्ट्रवादी काँग्रेसचे प्रदेशाध्यक्ष शशिकांत शिंदे हेही त्यांची भेट घेणार असल्याची माहिती आहे.
शरद पवार यांच्या प्रकृतीची विचारपूस करण्यासाठी अनेक नेत्यांनी फोनद्वारे संपर्क साधला. मनसे अध्यक्ष राज ठाकरे, पश्चिम बंगालच्या मुख्यमंत्री ममता बॅनर्जी आणि केंद्रीय मंत्री राजनाथ सिंह यांनी फोन करून त्यांच्या तब्येतीची माहिती घेतली.
काँग्रेस नेते राहुल गांधी आणि प्रियांका गांधी यांनीही शरद पवार यांच्याशी फोनवरून संपर्क साधून प्रकृतीची विचारपूस केल्याची माहिती सूत्रांनी दिली. शिवसेना ठाकरे गटाचे पक्षप्रमुख उद्धव ठाकरे यांनीही फोन करून त्यांच्या तब्येतीची चौकशी केली.
याशिवाय आमदार राणा जगजितसिंह पाटील, उद्योगपती गौतम अदानी आणि इतर नेत्यांनीही रुग्णालयात जाऊन शरद पवार यांची भेट घेतली आहे. त्यांच्या प्रकृतीत सुधारणा होत असून लवकरच त्यांना रुग्णालयातून डिस्चार्ज मिळण्याची शक्यता व्यक्त केली जात आहे.
