Cyber Crime : नवी मुंबई : पनवेल (Panvel) परिसरात रुग्णालयाच्या नावाने ऑनलाइन फसवणूक झाल्याची गंभीर घटना समोर आली आहे. कळंबोली येथील सेक्टर 1 मधील एका सोसायटीत राहणाऱ्या 60 वर्षीय ज्येष्ठ नागरिकांची 6 लाख 40 हजार रुपयांची फसवणूक झाल्याचे उघड झाले आहे. या प्रकारामुळे परिसरात खळबळ उडाली आहे. (Cyber Crime)
फोन लावला अन् अनर्थ घडला
मिळालेल्या माहितीनुसार, संबंधित ज्येष्ठ नागरिक उपचारासाठी कर्नाटकातील नागरमोळी येथील एका आयुर्वेद रुग्णालयाची माहिती इंटरनेटवर शोधत होते. शोध घेत असताना त्यांना अधिकृत संकेतस्थळासारखे दिसणारे एक वेबसाइट आढळले. त्यावर दिलेल्या मोबाईल क्रमांकावर त्यांनी संपर्क साधला. फोनवर बोलणाऱ्या दोन व्यक्तींनी स्वतःला रुग्णालयाचे प्रतिनिधी सांगत विश्वास संपादन केला.
बॅंक खात्यातून पैसे गायब
यानंतर त्या व्यक्तींनी ज्येष्ठांच्या मोबाईलवर डॉट एपीके फाइल पाठवून ती डाउनलोड करण्यास सांगितले. विश्वास ठेवून त्यांनी ती फाइल डाउनलोड केली. त्यानंतर काही वेळातच त्यांच्या बँक खात्यातून टप्प्याटप्प्याने 6 लाख 40 हजार रुपये दुसऱ्या खात्यात वळवण्यात आले.
नंतर संबंधितांनी थेट रुग्णालयाशी संपर्क साधला असता कोणतीही रक्कम मिळालेली नसल्याचे समजले. तेव्हा आपली फसवणूक झाल्याचे त्यांच्या लक्षात आले. त्यांनी तात्काळ पोलीस ठाण्यात जाऊन तक्रार दाखल केली.
या घटनेमुळे ऑनलाइन व्यवहार करताना काळजी घेणे किती आवश्यक आहे हे स्पष्ट झाले आहे. कोणतीही अज्ञात फाइल डाउनलोड करू नये, अधिकृत संकेतस्थळाची खातरजमा करावी आणि संशयास्पद कॉलवर विश्वास ठेवू नये, असे आवाहन पोलिसांकडून करण्यात येत आहे. पुढील तपास सुरू आहे.
