Crime News: मुंबई : नवी मुंबईतील रबाळे परिसरात मॉर्निंग वॉकसाठी बाहेर पडलेल्या एका महिलेची सोन्याची चैन जबरीने हि सकावून नेणाऱ्या आरोपीला पोलिसांनी अटक केली आहे. या प्रकरणी रबाळे पोलीस ठाण्यात गुन्हा दाखल करण्यात आला असून आरोपीकडून इतर गुन्ह्यांचाही उलगडा झाला आहे.
ही घटना 14 मार्च 2026 रोजी सकाळी सुमारे 7.50 वाजण्याच्या सुमारास घडली. फिर्यादी अनिता राजकुमार गुप्ता (वय 54, रा. घणसोली, नवी मुंबई) या आपल्या सोसायटीमध्ये स्कुटी पार्क करत असताना पाठीमागून आलेल्या अज्ञात व्यक्तीने त्यांच्या गळ्यातील सुमारे 25 ग्रॅम वजनाची आणि अंदाजे 1,25,000 रुपये किमतीची सोन्याची चैन जबरीने खेचून चोरी केली. या घटनेनंतर तातडीने दुपारी 12.18 वाजता रबाळे पोलीस ठाण्यात गुन्हा नोंदवण्यात आला.
घटनेनंतर पोलिसांनी तपासाची चक्रे वेगाने फिरवली. वरिष्ठ पोलीस निरीक्षक बाळकृष्ण सावंत यांच्या मार्गदर्शनाखाली पोलिसांनी घटनास्थळाची पाहणी केली. परिसरातील सीसीटीव्ही फुटेज तपासण्यात आले तसेच तांत्रिक माहिती आणि गुप्त बातमीदारांच्या मदतीने आरोपीचा माग काढण्यात आला.
तपासादरम्यान अजिंक्य अनंत शिंदे (वय 36, रा. कामोठे, जिल्हा रायगड) याला अटक करण्यात आली. चौकशीत त्याचा या गुन्ह्यात सहभाग असल्याचे स्पष्ट झाले. त्याच्यावर यापूर्वीही काही गंभीर गुन्हे नोंद असल्याची माहिती समोर आली आहे. पोलिसांनी त्याच्याकडून चोरीस गेलेला मुद्देमाल जप्त करण्याची प्रक्रिया सुरू केली आहे.
या कारवाईत सहाय्यक पोलीस निरीक्षक दिपक खरात आणि त्यांच्या पथकाने महत्त्वाची भूमिका बजावली. पुढील तपास रबाळे पोलीस ठाण्याकडून सुरू आहे.
