मुंबई : राज्यातील मराठा समाजातील विद्यार्थ्यांना आता आर्थिक मागास वर्गातून म्हणजचे EWS मधून नियुक्त्या मिळण्याचा मार्ग मोकळा झाला आहे. कारण एसईबीसीचे आरक्षण रद्द झाल्यानंतर मॅटने रोखलेल्या पदांची भरती आता करता येईल. यामुळे 408 उमेदवारांना मुंबई हायकोर्टाने मोठा दिलासा दिला. 2019 पासून या नियुक्त्या रखडल्या होत्या. आता महाराष्ट्र लोकसेवा आयोग, वनसेवा, कर सहाय्यक, पीएसआय, कनिष्ठ अभियंता, इतर पदांसाठी या नियुक्त्या करण्यात येणार आहे. यामुळे एकूण 3 हजार 485 उमेदवारांना नियुक्त्या मिळणार आहेत.
एसईबीसी आणि ईडब्ल्यूएस आरक्षणाचे प्रकरण हे न्यायालायात प्रलंबित होते. या प्रवर्गातून या विद्यार्थ्यांना दहा टक्के आरक्षणाची तरतूद करण्यात आली आहे. परंतु, हे प्रकरण कोर्टात असल्यामुळे या विद्यार्थ्यांच्या नियुक्त्या रखडल्या होत्या. पण आता उच्च न्यायालयाने या नियुक्त्या ईडब्ल्यूएसमधून करण्याचे निर्देश दिले आहेत.
महाराष्ट्र लोकसेवा आयोगच्या 2020 पासूनच्या नियुक्त्या या रखडल्या होत्या. निवड होऊन अनेक महिने उलटले तरीही विद्यार्थ्यांना नियुक्त्या मिळाल्या नव्हत्या. त्यासाठी निवड झालेल्या विद्यार्थ्यांनी उपोषणाचा देखील पवित्रा घेतला होता. ईडब्ल्यूएस प्रकरण न्यायालयात प्रलंबित होते, त्यामुळे विद्यार्थ्यांच्या नियुक्त्यांना देखील ब्रेक लागला होता. पण आता या नियुक्त्या होणार आहेत.
