मुंबई : मुंबई उपनगरातील मालाड येथे एका डॉक्टरांच्या दवाखान्यामध्ये अल्पवयीन मुलीचा मृतदेह सापडल्याची धक्कादायक माहिती उघडकीस आली आहे. या घटनेनंतर परिसरात मोठी खळबळ उडाली आहे. याप्रकरणी डॉक्टराविरुध्द बलात्कार आणि आत्महत्येस प्रवृत्त केल्याप्रकरणी पोलिसांनी गुन्हा दाखल केला आहे, अशी माहिती एका पोलिस अधिकाऱ्याने दिली आहे. मालाड पोलिस या प्रकरणी अधिक तपास करत आहेत.
मिळालेल्या अधिक माहितीनुसार, 28 डिसेंबर रोजी काम करत असलेल्या क्लिनिकमध्येच एका अल्पवयीन मुलीचा मृतदेह सापडला. धक्कादायक म्हणजे मुलीचा मृतदेह हा लटकलेल्या अवस्थेत होता. या घटनेची माहिती मिळताच, मालाड येथील कुरार पोलिस स्टेशनचे एक पथक घटनास्थळी दाखल झाले आणि मुलीचा मृतदेह खाली घेतला. यानंतर मृतदेह शवविच्छेदनासाठी नागरी रुग्णालयात पाठवण्यात आला आहे.
काही दिवसांपूर्वी डॉक्टरांची आईकडे तक्रार
काही दिवसांपूर्वीच मुलीने डॉक्टरांच्या अपमानास्पद वागणुकीबद्दल आईकडे तक्रार केली होती, त्यामुळे मुलीने आत्महत्या केली नाही, असा दावा मृत मुलीच्या आईने केली आहे. मृत मुलीच्या आईच्या तक्रारीच्या आधारे, पोलिसांनी डॉक्टरांविरुद्ध आयपीसी कलम 306 (आत्महत्येला प्रवृत्त करणे), 376 (बलात्कारासाठी शिक्षा) आणि बाल न्याय कायदा आणि लैंगिक गुन्ह्यांपासून मुलांचे संरक्षण कायदा (POCSO कायदा) मधील संबंधित तरतुदींनुसार गुन्हा दाखल केला आहे. या प्रकरणाचा पुढील तपास मालाड पोलिस करत आहेत.
