मुंबई : युवासेनाप्रमुख आदित्य ठाकरे यांनी महालाक्ष्मी रेसकोर्स येथील जागेबाबत अतिशय खळबळजनक वक्तव्य केले आहे. मुख्यमंत्री एकनाथ शिदे यांच्या अध्यक्षतेखाली पार पडलेल्या बैठकीत २२६ एकर खुल्या जागेची आभासी विक्री आणि जमीन बळकावण्यास सहमती दर्शविली आहे, असा खळबळजनक आरोप आदित्य ठाकरेंनी केला आहे.
रेसकोर्सची जमीन राज्य सरकारच्या जवळील बिल्डर हडपण्याचा प्रयत्न करत आहे. असा आरोप आदित्य ठाकरेंकडून केला जातोय. रेसकोर्सच्या जागेसंदर्भात६ डिसेंबर २०२३ ला सकाळी ११ वाजता बैठक घेण्यात आली, ज्यामध्ये चार रॉयल वेस्टर्न इंडिया टर्फ क्लब व्यवस्थापन, ४ वरिष्ठ अधिकार्यांसह मुख्यमंत्र्यांच्या अध्यक्षतेखाली बैठक झाली. या बैठकीला महापालिका आयुक्तही उपस्थित होते. या वरिष्ठ अधिकाऱ्यांनी काही निकषांवर २२६ एकर खुल्या जागेची आभासी विक्री आणि जमीन बळकावण्यास सहमती दर्शविली आहे”, असा खळबळजनक आरोप आदित्य ठाकरे यांनी ट्विटरवर केलाय.
रॉयल वेस्टर्न इंडिया टर्फ क्लबच्या या २-३ सदस्यांनी पालिका आयुक्तांना वार्षिक सर्वसाधारण सभेत बाकीच्या सदस्यांना प्रेझेंटेशन देण्यास सांगितले आहे, जेणेकरून समितीला इतरांवर प्रभाव पाडण्यास मदत होईल. रॉयल वेस्टर्न इंडिया टर्फ क्लबने झोपडपट्टी पुनर्वसन प्रकल्पाबाबत कोणतीही स्पष्टता न देता चर्चा केली आहे. आरडब्ल्यूआयटीसी/एआरसीच्या प्रत्येक सदस्याला सरकारच्या या जमीन हडप प्रस्तावाची माहिती होती का? असा सवाल आदित्य ठाकरेंनी केलाय.
“९१ एकर आरडब्ल्यूआयटीसीकडे (व्यवस्थापनाकडे) ठेवली जाईल आणि उर्वरित बीएमसी विकासासाठी स्वतःच्या ताब्यात घेईल. रॉयल वेस्टर्न इंडिया टर्फ क्लबसाठी ३० वर्षांच्या लीज करारावर स्वाक्षरी केली जाईल. या प्रस्तावाला सहमती देण्यासाठी इतर घोडे मालकांना प्रभावित करण्यासाठी बीएमसी रेसकोर्सवरील तबेले पुनर्बांधणीसाठी जवळपास १०० कोटी खर्च करेल. जिथे व्यवस्थापनाने खर्च करायला हवा तिथे आमच्या करदात्यांच्या १०० कोटींचा वापर का केला जातोय?”, असा सवाल आदित्य ठाकरेंनी केलाय.
