मुंबई: महाराष्ट्रात सध्या महापालिका निवडणुकीची गडबड सुरू असतानाच जिल्हा परिषद आणि पंचायत समिती (ZP Election) निवडणुकीबाबत मोठी अपडेट समोर आली आहे. राज्य निवडणूक आयोग या आठवड्यात, विशेषतः बुधवारी 7 जानेवारी रोजी, या निवडणुकांचा कार्यक्रम अधिकृतपणे जाहीर करण्याची शक्यता आहे. 16 जानेवारीला महापालिकांचे निकाल लागल्यानंतर ग्रामीण भागातील निवडणुकीचे बिगुल वाजणार असून, 7 फेब्रुवारी रोजी मतदान होण्याची चिन्हे आहेत.
प्रशासकीय सूत्रांच्या माहितीनुसार, सर्वोच्च न्यायालयाने या निवडणुका 31 जानेवारी 2026 पर्यंत पूर्ण करण्याचे आदेश दिले होते. मात्र, एकाच वेळी महापालिका आणि जिल्हा परिषदेच्या निवडणुका आल्याने कर्मचाऱ्यांची मोठी कमतरता भासत आहे. हे मनुष्यबळ व्यवस्थापित करणे निवडणूक आयोगासाठी कठीण जात असल्याने, मतदानाची तारीख फेब्रुवारीच्या पहिल्या आठवड्यात नेण्याबाबत गांभीर्याने विचार सुरू आहे. या संदर्भात सर्वोच्च न्यायालयाकडे काही दिवसांची मुदतवाढ मागण्याचे प्रयत्नही प्रशासन स्तरावर सुरू आहेत.
या पार्श्वभूमीवर, निवडणूक आयोगाने बुधवारी एक महत्त्वाची बैठक बोलावली आहे. या बैठकीत कायदा व सुव्यवस्था, मतदान यंत्रांची उपलब्धता आणि कर्मचाऱ्यांचे नियोजन यावर सविस्तर चर्चा होईल. राजकीय पक्षांनीही प्रचारासाठी पुरेसा वेळ देण्याची मागणी केली आहे. ईव्हीएम यंत्रे पुरेशी असली तरी, कर्मचाऱ्यांच्या मर्यादांमुळे निवडणुकीच्या तारखांमध्ये थोडा बदल होऊ शकतो. बुधवारी होणाऱ्या या बैठकीनंतरच निवडणुकांचे नेमके वेळापत्रक स्पष्ट होईल.
