Tilak Varma: धर्मशाळा येथे झालेल्या तिसऱ्या टी-20 आंतरराष्ट्रीय सामन्यात युवा फलंदाज तिलक वर्माने एक महत्त्वाचा विक्रम आपल्या नावावर केला आहे. दक्षिण आफ्रिकेविरुद्ध सातत्यपूर्ण कामगिरीच्या जोरावर तिलक वर्माने टी-20 आंतरराष्ट्रीय क्रिकेटमध्ये कोणत्याही एका संघाविरुद्ध सर्वाधिक सरासरी असणारा भारतीय फलंदाज होण्याचा मान मिळवला आहे. या कामगिरीसह त्याने महान फलंदाज विराट कोहलीचा विक्रम मागे टाकला आहे.
तिसऱ्या क्रमांकावर फलंदाजी करताना तिलक वर्माने 35 चेंडूत तीन चौकारांच्या मदतीने नाबाद 25 धावा केल्या. ही खेळी संयमी आणि परिस्थितीची गरज ओळखत केली. धावांचा पाठलाग करताना त्याने उपकर्णधार शुभमन गिलला भक्कम साथ दिली आणि संघाला विजयाच्या दिशेने नेण्यात मोलाची भूमिका बजावली.
विराट कोहलीचा विक्रम मोडीत
या नाबाद खेळीनंतर तिलक वर्माची दक्षिण आफ्रिकेविरुद्ध टी-20 आंतरराष्ट्रीय सामन्यांतील सरासरी 70.50 इतकी झाली आहे. किमान 300 धावा करणाऱ्या भारतीय फलंदाजांमध्ये ही सर्वोच्च सरासरी असून, याआधी हा विक्रम विराट कोहलीकडे होता. कोहलीने पाकिस्तानविरुद्ध टी-20 फॉरमॅटमध्ये 70.28 ची सरासरी नोंदवली होती.
धावांचा पाठलाग करताना देखील तिलक वर्माची कामगिरी उल्लेखनीय ठरली आहे. टी-20 आंतरराष्ट्रीय सामन्यांमध्ये धावांचा पाठलाग करताना त्याची सरासरी 68 इतकी असून, या बाबतीतही त्याने विराट कोहली (67.1) याला मागे टाकले आहे.
आतापर्यंत तिलक वर्माने दुसऱ्या क्रमांकावर फलंदाजी करताना 16 टी-20 आंतरराष्ट्रीय डावांमध्ये 543 धावा केल्या आहेत. यात त्याची सर्वोच्च धावसंख्या नाबाद 72 असून सरासरी 68 इतकी आहे. दुसरीकडे, विराट कोहलीने आपल्या टी-20 कारकिर्दीत 48 सामन्यांत 2013 धावा केल्या असून त्याची सरासरी 67.10 आहे.
तिलक वर्माने तीन सामन्यांत 113 धावा केल्या
सध्याच्या भारत-दक्षिण आफ्रिका टी-20 मालिकेत तिलक वर्माने तीन सामन्यांत 113 धावा केल्या आहेत. पहिल्या सामन्यात 26, दुसऱ्या सामन्यात 62 आणि तिसऱ्या सामन्यात नाबाद 25 धावांची खेळी त्याने केली. अवघ्या 23 व्या वर्षी, तिसऱ्या क्रमांकावर फलंदाजी करताना त्याने 14 डावांत 468 धावा केल्या असून त्याची सरासरी 58.5 इतकी आहे.
एकूणच, तिलक वर्माने 39 टी-20 सामन्यांत 1,110 धावा केल्या असून त्याची सरासरी 48.26 आहे. सातत्यपूर्ण कामगिरी, संयम आणि धावांचा पाठलाग करताना दाखवलेली परिपक्वता यामुळे तिलक वर्मा भारतीय संघाचा नवा ‘चेस मास्टर’ म्हणून ओळख निर्माण करत आहे.
