दौंड, (पुणे) : दौंड पोलीस ठाण्याच्या हद्दीत मागील चोवीस तासांत तिघांचा वेगवेगळ्या कारणांनी मृत्यू झाल्याच्या घटना घडल्या असून, यापैकी दोन मृत्यूंची नोंद आकस्मिक मृत्यू म्हणून करण्यात आली आहे. तर एका तरुणाने रुग्णालयातच गळफास घेऊन आत्महत्या केल्याची माहिती समोर आली आहे.
अभिषेक गोविंद पहाडे (वय 24, रा. निमगाव खेलू, ता. श्रीगोंदा, जि. अहमदनगर) या तरुणाने पाटील हॉस्पिटल, दौंड येथील दुसऱ्या मजल्यावरील खासगी रूममध्ये बेडशिटच्या सहाय्याने गळफास घेतल्याची घटना रात्री 10 वाजता उघडकीस आली. याप्रकरणी भाऊ अभिषेक गोविंद पहाडे यांना डॉ. पाटील यांनी सदरची माहिती दिली. त्यानुसार सदर ठिकाणी पोहोचले असता पोलिसांच्या मदतीने भाऊ अभिषेक पहाडे यास खाली उतरून अबुलन्समधून उपजिल्हा रूग्णालय येथे घेवून गेले. यावेळी तेथील डॉक्टरांनी त्याला औषधोपचारापूर्वी मयत झाल्याची माहिती दिली. या प्रकरणी दौंड पोलीस ठाण्यात आकस्मात मृत्यू रजिस्टर नं. 70/2025 अन्वये नोंद करण्यात आली आहे.
दुसऱ्या घटनेत खोरवडी (ता. दौंड) येथील गट नं. 239 मधील एका शेताच्या विहिरीत अंदाजे 35-40 वयोगटातील अनोळखी पुरुषाचा मृतदेह सापडला. या इसमाने पांढऱ्या रंगाचा लाईनिंगचा शर्ट, निळ्या रंगाची जिन्स परिधान केली होती. व त्याचे केस लालसर रंगाचे होते. पोलीस पाटील भारत महादू जोरवर यांनी याबाबत दौंड पोलीस स्टेशनला माहिती दिली असून, आकस्मात मृत्यूची नोंद करण्यात आली आहे.
तिसऱ्या घटनेत दौंड येथील आहीर गुरूजी भवन, शिवाजी चौक (दौंड) येथे ताराबाई विश्वचंद्र आहीर (वय 75) या महिला वैष्णवी फ्लॉवर मार्ट या दुकानात बसलेल्या असताना राहत्या घराची भिंत अचानक पत्र्याच्या शेडवर कोसळली. त्यांचा भाचा मंगलकुमार आहीर यांनी घटनास्थळी धाव घेत त्यांना रिक्षाने आनंद हॉस्पिटल येथे नेले असता, डॉक्टरांनी तपासून उपचारापूर्वीच मृत घोषित केले. याप्रकरणी आकस्मात मृत्यू क्रमांक 68/2025 अंतर्गत नोंद करण्यात आली आहे.
दरम्यान, तिन्ही घटनांमध्ये दौंड पोलीस ठाण्याचे अधिकारी पुढील तपास करत आहेत. या मृत्यूंमुळे परिसरात खळबळ निर्माण झाली आहे.
