पुणे : नोटाबंदीच्या निर्णयानंतर देशभरात 500 आणि 1000 रुपयांच्या जुन्या नोटा चलनातून बाद झाल्या होत्या. त्यानंतर रिझर्व्ह बँक ऑफ इंडियाने 2000 रुपयांची गुलाबी नोट बाजारात आणली. मात्र, काही काळापूर्वी या 2000 रुपयांच्या नोटांची छपाई थांबवून त्याही चलनातून मागे घेण्याचा निर्णय घेण्यात आला. या नोट शिल्लक असेल, तर घाबरून जाण्याचे अजिबात कारण नाही. या नोटा बदलून घेण्यासाठी रिझर्व्ह बँकेकडून एक अत्यंत महत्त्वाची आणि दिलासादायक अपडेट समोर आली आहे. तुमच्या जवळील या नोटा तुम्ही अजूनही अगदी सहजपणे बदलून घेऊ शकता, अशी माहिती आरबीआयने आपल्या अधिकृत सोशल मीडियावर दिली आहे.
नोटा कशा बदलणार? जाणून घ्या दोन सोपे मार्ग.
तुमच्याकडील 2000 रुपयांची नोट बदलण्यासाठी तुम्ही आरबीआयच्या देशभरातील 19 पैकी कोणत्याही एका ‘इश्यू ऑफिस’मध्ये थेट जाऊ शकता. तिथे तुम्हाला या नोटेच्या बदल्यात नवीन पैसे मिळतील.
जर तुम्हाला आरबीआयच्या कार्यालयात स्वतः जाणे शक्य नसेल, तर एक उत्तम पर्याय उपलब्ध आहे. तुम्ही भारतीय डाक सेवेचा (Post) वापर करून तुमची 2000 रुपयांची नोट आरबीआयच्या,19 पैकी कोणत्याही एका कार्यालयाच्या पत्त्यावर पाठवू शकता. ही नोट तिथे पोहोचल्यानंतर, त्या नोटेची अचूक रक्कम थेट तुमच्या बँक खात्यात जमा केली जाईल.
या प्रक्रियेबद्दल किंवा नियमांबद्दल तुम्हाला आणखी सविस्तर माहिती हवी असल्यास, तुम्ही आरबीआयच्या अधिकृत वेबसाईटला भेट देऊ शकता. त्यामुळे मनात कोणतीही शंका न ठेवता, आपल्या जवळील नोटा सुरक्षितपणे बदलून घेऊ शकता.
