पुणे: राष्ट्रवादी काँग्रेस पक्षाच्या पुणे शहर (Rupali Thombre Patil) पूर्व विभागाची जम्बो कार्यकारिणी बुधवारी जाहीर झाली असून आगामी महानगरपालिका निवडणुकीच्या पार्श्वभूमीवर मोठ्या प्रमाणात पदाधिकाऱ्यांना संधी देण्यात आली आहे. पूर्व विभागाचे शहराध्यक्ष आणि माजी आमदार सुनील टिंगरे यांनी ही यादी जाहीर केली. कार्यकारिणीत समन्वयक, निरीक्षक, शहर पदाधिकारी, विविध सेल प्रमुख अशा पदांवर मोठ्या प्रमाणावर नियुक्त्या करण्यात आल्या आहेत. (Pune News)
या जाहीर केलेल्या कार्यकारिणीत ॲड. रूपाली पाटील ठोंबरे यांची कार्याध्यक्षपदी नियुक्ती करून त्यांच्या नाराजीवर पडदा टाकण्याचा प्रयत्न पक्षाने केला आहे. काही दिवसांपूर्वी प्रवक्तेपदाच्या फेरनिवडीत त्यांना वगळल्याने त्यांनी जाहीर नाराजी व्यक्त केली होती. त्यामुळे आता त्यांना मिळालेली ही जबाबदारी पक्षातील अंतर्गत नाराजी निवळण्याचे पाऊल मानले जात आहे. पूर्व विभागात वडगाव शेरी, हडपसर, शिवाजीनगर आणि कसबा पेठ हे विधानसभा मतदारसंघ येतात. हाजी फिरोज शेख यांची कार्याध्यक्षपदी आधीच निवड झाली होती.
राष्ट्रवादीने जाहीर केलेल्या या कार्यकारिणीत तब्बल जवळपास 250 पदाधिकाऱ्यांचा समावेश आहे. यामध्ये 39 उपाध्यक्ष, 22 सरचिटणीस, 17 चिटणीस आणि 20 संघटक सचिवांचा समावेश आहे. चार विधानसभांतील विविध कार्यकर्त्यांना स्थान देत आगामी निवडणुकांसाठी पक्षाने संघटन मजबूत करण्याचा प्रयत्न केला आहे. मात्र, उर्वरित चार मतदारसंघांची कार्यकारिणी कधी जाहीर होणार, याबाबत अद्यापही उत्सुकता आहे.
दरम्यान, पक्षाकडून इतरही महत्त्वपूर्ण नियुक्त्या जाहीर करण्यात आल्या आहेत. माजी आमदार महादेव बाबर यांची प्रदेश प्रतिनिधीपदी, विकास पासलकर यांची प्रवक्तेपदी तसेच राकेश कामठे यांची शहर समन्वयकपदी नियुक्ती झाली आहे. तसेच माजी नगरसेवक बाळासाहेब बोडके, बाळासाहेब कोद्रे, नारायण लोणकर आणि विजय ढेरे यांची निरीक्षकपदी निवड झाली आहे. महिला विभागाच्या अध्यक्षपदी हसीना इनामदार, युवक विभागाच्या अध्यक्षपदी ईशान तुपे आणि युवती विभागाच्या अध्यक्षपदी लावण्या शिंदे यांची नियुक्ती करण्यात आली आहे.
