पुणे : राज्यभरात सध्या अन्न व औषध प्रशासनाचे आयुक्त तुकाराम मुंढे यांच्या मार्गदर्शनाखाली अन्न भेसळ आणि प्रतिबंधित औषधांच्या बेकायदेशीर वापराविरोधात जोरदार मोहीम सुरू आहे, याच मोहिमेचा भाग म्हणून उल्हासनगर येथील एका गोठ्यावर छापा टाकून एफडीएच्या पथकाने धडक कारवाई केली. यावेळी दुधाचे उत्पादन वाढवण्यासाठी म्हशींना बेकायदेशीरपणे टोचण्यात येणाऱ्या ऑक्सिटोसिन इंजेक्शन्सचा मोठा साठा अन्न व औषध प्रशासनाने जप्त केला आहे.
मिळालेल्या माहितीनुसार, उल्हासनगर कॅम्प क्रमांक 3 मधील ओटी सेक्शन परिसरातील जसलोक हायस्कूलजवळ प्रकाश वाधवानी यांचा म्हशींचा गोठा आहे. या गोठ्यात प्रतिबंधित औषधांचा वापर होत असल्याची खात्रीशीर माहिती प्रशासनाला मिळाली होती. त्यानुसार एफडीएच्या अधिकाऱ्यांनी तेथे अचानक धाड टाकली. या कारवाईत जनावरांसाठी अत्यंत घातक असलेल्या ऑक्सिटोसिन या औषधाची तब्बल 612 इंजेक्शन्स आणि त्यासाठी लागणाऱ्या प्लास्टिकच्या रिकाम्या बाटल्यांचा मोठा साठा जप्त करण्यात आला.
वैद्यकीय तज्ज्ञांच्या मते, ऑक्सिटोसिनचा वापर जनावरांसाठी कमालीचा वेदनादायी आणि क्रूर ठरतो. केवळ जनावरांनाच नाही, तर अशा प्रकारे काढलेले दूध पिणाऱ्या नागरिकांच्या आरोग्यालाही यामुळे मोठा धोका निर्माण होतो. प्रामुख्याने लहान मुले आणि गर्भवती महिलांवर याचे अत्यंत विपरीत व गंभीर परिणाम होऊ शकतात. याच घातक परिणामांमुळे शासनाने या औषधाच्या विक्रीवर आणि वापरावर कायदेशीर बंदी घातली आहे.
याप्रकरणी जनावरांच्या जिवाशी खेळणाऱ्या आणि बेकायदेशीर औषधसाठा बाळगणाऱ्या संबंधित गोठा चालकाविरुद्ध अन्न सुरक्षा आणि औषध प्रशासन कायद्यानुसार कडक कारवाई करण्यात आली आहे. एफडीएच्या या धडक कारवाईमुळे ठाणे जिल्हा आणि उल्हासनगर परिसरातील बेकायदेशीर दुग्ध व्यवसाय करणाऱ्यांमध्ये खळबळ उडाली आहे. नियमांचे उल्लंघन करणाऱ्यांची गय केली जाणार नाही, असा इशारा प्रशासनाने दिला आहे.
