पुणे : पुण्यातील प्रसिद्ध बांधकाम व्यावसायिक आणि कंत्राटदार खलील शेख यांनी गळफास घेऊन आत्महत्या केल्याची घटना उघडकीस आली होती. आता या आत्महत्या प्रकरणाला राजकीय वळण लागले आहे. याप्रकरणी पोलिसांनी माजी आमदार रवींद्र धंगेकर, त्यांच्या पत्नी आणि इतर 12 जणांविरुद्ध स्वारगेट पोलीस ठाण्यात गुन्हा नोंदवला आहे. गुन्हा दाखल झाल्याचे समजताच रवींद्र धंगेकर यांच्यासह इतर आरोपी सध्या फरार झाले असून, पोलीस त्यांचा कसून शोध घेत आहेत.
राज्याचे मुख्यमंत्री देवेंद्र फडणवीस आज पुणे दौऱ्यावर आले असता, या प्रकरणावरून वातावरण चांगलेच तापले. खलील शेख यांच्या नातेवाईकांनी मुख्यमंत्र्यांची भेट घेण्यासाठी गणेश कला क्रीडा रंगमंच परिसर गाठला होता. मात्र, सुरक्षेच्या कारणास्तव पोलिसांनी त्यांना मुख्यमंत्र्यांना भेटू दिले नाही.मात्र फडणवीस यांनी या प्रकरणावर आपली भूमिका स्पष्ट केली आहे.
ते म्हणाले, या प्रकरणात पोलिसांवर कोणाचाही दबाव नाही. गुन्हा दाखल झाला असून पोलीस पूर्णपणे स्वतंत्रपणे आणि कायद्यानुसार योग्य ती कारवाई करत आहेत. कायदेशीर प्रक्रिया नियमाप्रमाणे पार पाडली जाईल,” अशी ग्वाही मुख्यमंत्र्यांनी दिली. या संपूर्ण प्रकरणाचा पुढील तपास स्वारगेट पोलीस करत आहेत.
गुलटेकडी भागात राहणाऱ्या खलील शेख यांनी गुरुवारी सकाळी आत्महत्या करण्यापूर्वी एक व्हिडिओ रेकॉर्ड केला होता. या व्हिडिओमध्ये त्यांनी विविध आर्थिक व्यवहारांमुळे आपल्यावर प्रचंड कर्ज झाल्याचे नमूद केले होते. याच कर्जाच्या आणि आर्थिक विवंचनेच्या त्रासाला कंटाळून आपण हे टोकाचे पाऊल उचलत असल्याचे त्यांनी सांगितले.
विशेष म्हणजे, माजी आमदार रवींद्र धंगेकर यांनी आपल्या आर्थिक अडचणींकडे पूर्णपणे दुर्लक्ष केले, असा थेट आरोप शेख यांनी केला आहे. याशिवाय व्हिडिओमध्ये त्यांनी इतरही काही लोकांची नावे घेतली आहेत.त्यामुळे आता याप्रकरणी धंगेकर दाम्पत्य अडचणीत आले आहे.
