पुणे: कल्याणीनगरमध्ये झालेल्या बहुचर्चित पोर्शे अपघात प्रकरणी मोठी अपडेट समोर आली आहे. पुणे पोलिस दलावर मोठी कारवाई करण्यात आली आहे. (Pune Porsche Accident)
येरवडा पोलिस ठाण्याचे पोलीस निरीक्षक राहुल जगदाळे आणि सहायक पोलीस निरीक्षक विश्वनाथ तोडकरी यांना कर्तव्यात गंभीर दुर्लक्ष केल्याच्या आरोपावरून सेवेतून बडतर्फ करण्यात आले आहे. तसेच पोलीस शिपाई अमित शिंदे आणि आनंदा भोसले यांना पाच वर्षे मूळ वेतनावरच स्थिर ठेवण्याची शिक्षा सुनावण्यात आली आहे.
पोर्शे प्रकरण काय?
19 मे 2024 रोजी कल्याणीनगर परिसरात एका हाय-स्पीड पोर्शे कारने दुचाकीवरून जात असलेल्या दोन अभियंत्यांना जोरदार धडक दिली होती. यात अश्विनी कोस्टा आणि अनिश अवधिया या दोघांचाही जागीच मृत्यू झाला होता. कार चालवणारा तरुण 17 वर्षे 8 महिन्यांचा असून तो मद्यप्राशन केलेला असल्याची पुष्टी नंतर झाली.
अपघातानंतर प्रत्यक्षदर्शी म्हणून घटनास्थळी पोहोचलेल्या दोन पोलिस कर्मचाऱ्यांनी ही गंभीर माहिती कंट्रोल रूमला वेळेत न कळवल्याने, रात्री ड्युटीवर असलेल्या वरिष्ठ अधिकाऱ्यांपर्यंत वेळेत अहवाल पोहोचला नाही. या निष्काळजीपणाला अत्यंत गंभीर मानत संबंधित दोन अधिकाऱ्यांना थेट बडतर्फ करण्यात आले आहे.
सुरुवातीला अल्पवयीन आरोपीवर निष्काळजीपणे वाहन चालवण्याचा गुन्हा दाखल करण्यात आला होता. परंतु तो मद्यधुंद अवस्थेत वाहन चालवत असल्याचे समोर आल्यानंतर या प्रकरणाला गंभीर वळण मिळाले होते. पुणे पोलिसांनी त्याला अल्पवयीन न समजता प्रौढ म्हणून सुनावणी देण्याची मागणी केली होती. याचदरम्यान, बाल न्याय मंडळाने आरोपीला फक्त 14 तासांत जामीन देत 100 शब्दांचा निबंध, समाजसेवा, अध्ययनावर लक्ष केंद्रित करणे अशी सौम्य शिक्षा सुनावली होती.
हा निर्णय समोर येताच राज्यभरातून तीव्र टीका आणि संताप व्यक्त करण्यात आला होता. त्यानंतर संपूर्ण प्रकरणाने राज्यभरात मोठी चर्चा रंगवली होती.
