उरुळी कांचन: पुणे-सोलापूर लोहमार्गावर (Pune News) कोरेगाव मूळ (ता. हवेली) ग्रामपंचायत हद्दीत रेल्वेतून 25 ते 30 वयोगटातील एक तरुण खाली पडल्याची घटना घडली आहे. बुधवारी (ता. 17) दुपारी दोन वाजण्याच्या सुमारास हि घटना उघडकीस आली.या घटनेत तरुण गंभीर दुखापत झाला असून त्याला पुढील उपचारासाठी ससून रुग्णालयात दाखल करण्यात आले आहे. या अनोळखी तरुणाची ओळख पटविण्याचे उरुळी कांचन रेल्वे पोलिसांसमोर आव्हान उभे राहिले आहे.
मिळालेल्या माहितीनुसार, सदर तरुण हा परप्रांतीय असून रेल्वने प्रवास करीत होता. पुण्यावरून दौंडच्या दिशेने जाणाऱ्या रेल्वेत कोरेगाव मूळ हद्दीत अचानक रेल्वेतून खाली पडला. पडल्याचे नेमके कारण अद्याप समजू शकले नाही. या अपघातात त्याच्या पायाला, तोंडाला, डोक्याला, गंभीर दुखापत झाली असल्याची माहिती प्रत्यक्षदर्शिनी दिली. यावेळी त्याच्याजवळ एक मोबाईल फोन मिळाला असून तोही फुटलेल्या अवस्थेत आहे. त्यामुळे त्याची ओळख पटू शकली नाही.
सदर घटनेची माहिती रेल्वे पोलिसांना मिळाली असता त्यांनी कस्तुरी रुग्णवाहीकेशी संपर्क साधला. यावेळी रुग्णवाहिकेचे चालक संतोष झोंबाडे व त्याचे साथीदार माऊली लाड हे तात्काळ घटनास्थळी दाखल झाले. तसेच रेल्वे पोलीस पी. शिंदे यांनी जखमी तरुणाला तात्काळ उरुळी कांचन येथील सिद्धिविनायक हॉस्पिटल येथे दाखल करण्यात आले.
दरम्यान, या अपघातात तरुणाला गंभीर दुखापत झाल्याने त्याला पुढील उपचारासाठी पुण्यातील ससून रुग्णालयात दाखल करण्यात आले असून त्याच्यावर पुढील उपचार सुरु आहेत.
