छत्रपती संभाजीनगर: आई होण्यासाठी (Crime News) मदत करा आणि 25 लाख रुपये मिळवा, अशा आमिषाचे मेसेज पाठवून सायबर चोरट्यांकडून (Chhatrapati Sambhajinagar News) तरुणांची फसवणूक केली जात असल्याचा धक्कादायक प्रकार छत्रपती संभाजीनगरमध्ये उघडकीस आला आहे. गेल्या काही दिवसांत अशा प्रकारच्या 6 घटना समोर आल्या असून अनेक तरुणांची लाखो रुपयांची फसवणूक झाली आहे. नोकरदार, स्पर्धा परीक्षांची तयारी करणारे तरुण या जाळ्यात अडकत असल्याचे चित्र आहे. (Breaking News)
सुंदर महिलांचे फोटो वापरून गंडा
सायबर चोरटे सोशल मीडिया आणि मोबाईलवरून तरुणांशी संपर्क साधतात. सुंदर महिलांचे फोटो वापरून बनावट प्रोफाइल तयार केली जातात. या प्रोफाइलमध्ये स्वतःला श्रीमंत महिला दाखवून, अनेक वर्षांपासून अपत्यासाठी प्रयत्न सुरू आहेत, मात्र गर्भधारणा होत नाही, असा भावनिक मेसेज पाठवला जातो. मी आई झाले तर तुम्हाला 25 लाख रुपये देईन, असे आमिष दाखवून तरुणांना संवादात ओढले जाते. (Latest Marathi News)
अश्लील व्हिडीओ कॉल
हळूहळू विश्वास संपादन केल्यानंतर व्हिडिओ कॉलच्या नावाखाली तरुणांना अंगप्रदर्शन करायला भाग पाडले जाते. या संपूर्ण प्रकाराचे चोरटे गुपचूप व्हिडिओ रेकॉर्डिंग करतात. त्यानंतर हा व्हिडिओ व्हायरल करण्याची धमकी देऊन ब्लॅकमेलिंग सुरू होते. बदनामीच्या भीतीने तरुण पैसे देऊ लागतो आणि याच टप्प्यावर मोठ्या रकमा उकळल्या जातात.
करार अन् फसवणूक
फसवणुकीचा पुढचा टप्पा अधिक नियोजनबद्ध असतो. सर्वप्रथम करार करायचा आहे, असे सांगून रजिस्ट्रेशन फी घेतली जाते. त्यानंतर मेल आयडी व्हीआयपी डेटाबेसमध्ये टाकण्यासाठी ओळख पडताळणी शुल्क मागितले जाते. पुढे कर भरावा लागेल, पेमेंट रिलीज करण्यासाठी जीएसटी आणि प्रोसेसिंग चार्ज आवश्यक असल्याचे सांगितले जाते. सुरक्षिततेसाठी सिक्युरिटी डिपॉझिटही घेतले जाते. शेवटी कायदेशीर प्रक्रिया आणि गोपनीयता करारासाठी वकिलांचे शुल्क मागितले जाते.
धमक्यांची उजळणी
पैसे दिले नाहीत तर व्हिडिओ नातेवाईक, मित्र किंवा सहकाऱ्यांना पाठवण्याची धमकी दिली जाते. काही प्रकरणांमध्ये चोरटे प्रत्यक्ष व्हिडिओ पाठवून स्क्रीनशॉटही दाखवतात. त्यामुळे भीतीपोटी तरुण पुन्हा पुन्हा पैसे देत राहतो. सायबर पोलिसांनी नागरिकांना अशा मेसेजपासून सावध राहण्याचे आवाहन केले आहे. अशा प्रकारचे आमिष दाखवणारे मेसेज आल्यास त्याकडे दुर्लक्ष करावे आणि तातडीने सायबर पोलिसांकडे तक्रार नोंदवावी, असे आवाहन करण्यात आले आहे.
