इंदापूर: इंदापूर (Pune News) तालुक्यात भीमा नदीपात्रातून सुरू असलेल्या अवैध वाळू उपशावर महसूल विभागाने मंगळवारी मोठी आणि कठोर कारवाई केली. इंदापूरचे तहसीलदार जीवन बनसोडे यांच्या नेतृत्वाखालील पथकाने धाड टाकत वाळू माफियांचे 70 लाख रुपयांचे मोठे नुकसान केले.
ही कारवाई इंदापूर तालुक्यातील आजोती, सुगाव, पडस्थळ, शहा, माळवाडी आणि कांदलगाव या परिसरातील नदीपात्रात करण्यात आली. वाळूचा अवैध उपसा सुरू असताना महसूल पथक नदीकाठावर पोहोचले. प्रशासनाला पाहताच वाळू उपसा करणारे चालक त्यांच्या बोटी घेऊन पळून जाण्याचा प्रयत्न करू लागले.
पाहा व्हिडीओ:
View this post on Instagram
परंतु, महसूल सेवक आणि पथकातील कर्मचाऱ्यांनी तातडीने पळ काढणाऱ्या बोटींचा पाठलाग केला. या पाठलागानंतर कारवाई करत पथकाने वाळू उपसा करण्यासाठी वापरल्या जाणाऱ्या 7 बोटी जागेवरच पाण्यात बुडवून संपूर्ण मुद्देमाल नष्ट केला.
70 लाखांचा मुद्देमाल नष्ट
संपूर्ण कारवाईत, अवैध वाळू उपशासाठी वापरण्यात येणारे साहित्य आणि बोटी मिळून सुमारे 70 लाख रुपयांचा मुद्देमाल जागेवरच नष्ट करण्यात आला आहे, अशी माहिती प्रशासनाने दिली. तहसीलदार जीवन बनसोडे यांच्या मार्गदर्शनाखाली महसूल विभागाने वाळू माफियांवर केलेली ही आतापर्यंतची सर्वात मोठी कारवाई मानली जात आहे. अवैध वाळू उपसा रोखण्यासाठी अशाच प्रकारच्या कठोर आणि धडक कारवाया भविष्यातही सुरूच राहणार असल्याचा सख्त इशारा प्रशासनाने दिला आहे.
