Pune News: पुणे: पुण्यातील हडपसर परिसरातून एक धक्कादायक माहिती समोर येत आहे. सह्याद्री रुग्णालयात एका रुग्णाच्या मृत्यूमुळे तणावाची परिस्थिती निर्माण झाली आहे. रुग्णालयात उपचारासाठी दाखल असलेल्या एका रुग्णाचा शस्त्रक्रियेदरम्यान मृत्यू झाल्यानंतर संतापलेल्या नातेवाईकांनी रुग्णालयाच्या परिसरात मोठ्या प्रमाणात तोडफोड केली. Pune News
शुक्रवारी मोठ्या संख्येने जमलेल्या नातेवाईकांनी रुग्णालयाच्या इमारतीसह दर्शनी भागातील काचा स्टीलचे डबे आणि लोखंडी वस्तूंच्या साहाय्याने फोडल्या. त्यामुळे रुग्णालयाच्या प्रवेशद्वाराजवळ काचांचा खच पडला होता. या घटनेनंतर परिसरात एकच खळबळ उडाली आहे. या सर्व घटनांमुळे रुग्णालयात गोंधळाचे वातावरण निर्माण झाले.
घटनेनंतर मृत रुग्णाच्या नातेवाईकांनी सह्याद्री रुग्णालयाबाहेर ठिय्या आंदोलन सुरु केले. या आंदोलनामुळे परिसरात अतिरिक्त पोलिसांचा बंदोबस्त तैनात करण्यात आला.
या प्रकरणावर अजय सपकाळ यांनी प्रसारमाध्यमांशी बोलताना तीव्र संताप व्यक्त केला. त्यांनी सांगितले की स्वतः ते शिवसेना (शिंदे गट) वैद्यकीय कक्षाचे शहर प्रमुख आहेत, तरीही त्यांच्या कुटुंबाशी अशी वागणूक झाली तर सामान्य नागरिकांचे काय होणार, असा सवाल त्यांनी उपस्थित केला.
अजय सपकाळ पुढे म्हणाले की, “माझ्या वडिलांचे अल्सरचे शस्त्रक्रिया होती. फक्त दोन टाक्यांचे ऑपरेशन करायंच होतं. पण सह्याद्री रुग्णआलयात उपचारादरम्यान त्यांचा मृत्यू झाला. त्यांनी उपचारांमध्ये मोठी निष्काळजीपणा दाखवली. हे पूर्णपणे गैरव्यवहाराचे प्रकरण आहे. रुग्णालयावर कठोर कारवाई झालीच पाहिजे. तोपर्यंत आम्ही आंदोलन मागे घेणार नाही.”
याच सोबत अजय यांनी उपमुख्यमंत्री एकनाथ शिंदे यांना विनंती केली आहे की, या रुग्णालयावर कडक कारवाई केली जावी. दरम्यान, पोलिसांनी रुग्णालयातील तोडफोड प्रकरणी चौकशी सुरु केली आहे.
