Pune News: पुणे: पुणे ग्रामीण जिल्ह्यात आगामी नगरपालिकांच्या, नगरपरिषदांच्या तसेच जिल्हा परिषद व पंचायत समिती निवडणुका शांततेत, भयमुक्त वातावरणात पार पडाव्यात यासाठी पोलीस प्रशासनाकडून कडक कारवाई सुरू आहे. याच पार्श्वभूमीवर शिरुर तालुक्यातील एक धोकादायक सराईत गुन्हेगार एमपीडीए कायद्यांतर्गत स्थानबद्ध करण्यात आला आहे.
पोलीस अधीक्षक संदीप सिंह गिल्ल यांच्या मार्गदर्शनाखाली पुणे ग्रामीण जिल्ह्यात रेकॉर्डवरील गुन्हेगार, अवैध शस्त्र बाळगणारे, वाळू तस्कर, महिलांविरोधातील गुन्हे करणारे तसेच सार्वजनिक सुव्यवस्थेला धोका ठरणाऱ्या व्यक्तींविरोधात विशेष मोहिम राबविण्यात येत आहे. या मोहिमेत दरोडे, जबरी चोरी, महामार्गावरील लुटमारी, खंडणी, खुनाचा प्रयत्न आणि बेकायदेशीर अग्नीशस्त्र बाळगणाऱ्यांवर कारवाईचा बडगा उगारण्यात येत आहे.
शिरुर पोलीस स्टेशन हद्दीतील गोलेगाव रोड परिसरात राहणारा दिपक बबन गुंजाळ, वय 33, हा सराईत आणि धोकादायक गुन्हेगार असल्याचे पोलिसांच्या निदर्शनास आले होते. त्याच्यावर यापूर्वी बेकायदेशीर अग्नीशस्त्र बाळगणे, संगनमत करून घातक हत्यारांनी गंभीर दुखापत करणे, शिवीगाळ व दमदाटी करणे असे गंभीर गुन्हे दाखल आहेत. त्यामुळे त्याच्याविरोधात एमपीडीए कायद्यांतर्गत कारवाई करण्याचा प्रस्ताव शिरुर पोलीस स्टेशनचे पोलीस निरीक्षक संदेश कंजळे यांनी सादर केला होता.
या प्रस्तावाची छाननी करून पोलीस अधीक्षकांनी तो पुढील कार्यवाहीसाठी जिल्हाधिकारी तथा जिल्हादंडाधिकारी पुणे यांच्याकडे पाठवला. त्यानंतर जिल्हाधिकारी जितेंद्र डुड्डी यांनी सार्वजनिक सुव्यवस्थेला धोका ठरणाऱ्या कृत्यांना आळा घालण्यासाठी दिपक गुंजाळ याला एमपीडीए कायद्यान्वये स्थानबद्ध करण्याचा आदेश दिला.
त्या आदेशानुसार शिरुर पोलीस स्टेशन व स्थानिक गुन्हे शाखेच्या पथकांनी संयुक्त कारवाई करत दिनांक 13 डिसेंबर 2025 रोजी दिपक गुंजाळ याला ताब्यात घेतले आणि मध्यवर्ती कारागृह, नागपूर येथे दाखल करण्यात आले. ही कारवाई वरिष्ठ पोलीस अधिकाऱ्यांच्या मार्गदर्शनाखाली शिरुर पोलीस स्टेशन आणि स्थानिक गुन्हे शाखेच्या पथकाने यशस्वीपणे पार पाडली आहे.
