Ladki Bahin Yojna : महिला सक्षमीकरणाच्या उद्देशाने राज्य सरकारने सुरू केलेल्या महत्त्वाकांक्षी ‘मुख्यमंत्री माझी लाडकी बहीण योजने’च्या (Ladki Bahin Yojana) लाभार्थी महिलांसाठी एक अत्यंत महत्त्वाचा अपडेट समोर आला आहे. या योजनेचा लाभ घेणाऱ्या महिलांनी त्यांच्या e-KYC (ई-केवायसी) प्रक्रियेतील चुकांची दुरुस्ती करण्यासाठी ३१ डिसेंबर २०२५ पर्यंतची अंतिम मुदत निश्चित करण्यात आली आहे. (Ladki Bahin Yojna)
महिला व बालविकास मंत्री अदिती तटकरे यांनी सोशल मीडियावर पोस्ट करत ही माहिती दिली. त्यांनी स्पष्ट केले की, या मुदतीपूर्वी e-KYC मधील त्रुटी दूर न केल्यास, महिलांच्या खात्यात जमा होणारे पुढील १७ वा आणि १८ वा हप्ता ₹१५०० थांबण्याची शक्यता आहे.
मंत्री तटकरे यांनी सांगितले की, या योजनेतील बहुसंख्य महिला लाभार्थी दुर्गम आणि ग्रामीण भागातील असल्याने e-KYC करताना त्यांच्याकडून काही चुका होणे स्वाभाविक आहे. या चुका सुधारण्याची संधी मिळावी, अशी मागणी जोर धरत होती.
हाच विचार करून, तसेच महिला सक्षमीकरणाचा हेतू लक्षात घेऊन, राज्यातील लाडक्या बहिणींना e-KYC मध्ये केवळ एकदाच सुधारणा करण्याची संधी ३१ डिसेंबर २०२५ पर्यंत देण्यात आली आहे. महिला व बालविकास विभागाचा उद्देश जास्तीत जास्त महिलांना लाभ मिळवून देणे आणि प्रक्रिया सुलभ करणे हा आहे.
विशेष सूचना: ज्या महिलांचे पती किंवा वडील हयात नाहीत, अशा लाडक्या बहिणींना e-KYC प्रक्रिया पूर्ण करण्यासाठी पोर्टलवर विशेष सुविधाही उपलब्ध करून देण्यात आली आहे.
