प्रतिनीधी
सागर जगदाळे
Pune News: भिगवण दि. 4 : भिगवण (ता. इंदापूर) येथील साईनाथ शिक्षण प्रसारक मंडळ संचलित आदर्श माध्यमिक विद्यालयात प्रधानमंत्री पोषण शक्ती निर्माण योजनेअंतर्गत नव्याने बांधण्यात आलेल्या किचन शेडचे आज उत्साहात उद्घाटन करण्यात आले. विद्यार्थ्यांच्या पोषणात वाढ करण्यास व स्वच्छ, सुरक्षित आहार व्यवस्थेसाठी हे किचन शेड महत्वाची भूमिका बजावणार आहे. Pune News
कार्यक्रमाच्या अध्यक्षस्थानी साईनाथ शिक्षण प्रसारक मंडळाचे संस्थापक अध्यक्ष डॉ. चंद्रकांत खानावरे होते. मुख्य अतिथी म्हणून मंडळाचे अध्यक्ष डॉ. अमोल खानावरे, इंदापूर पंचायत समितीचे माजी उपसभापती संजय देहाडे, भिगवण ग्रामपंचायतीचे सरपंच व प्रथम नागरिक गुराप्पा पवार, पत्रकार निलेश गायकवाड उपस्थित होते. विद्यालयाच्या मुख्याध्यापिका सुचिता साळुंके, प्राथमिक विभागाच्या मुख्याध्यापिका पल्लवी वाघ, शिक्षक-शिक्षकेतर कर्मचारी व विद्यार्थी मोठ्या संख्येने कार्यक्रमास हजर होते.
उद्घाटन प्रसंगी बोलताना डॉ. चंद्रकांत खानावरे म्हणाले की, “विद्यार्थ्यांच्या आरोग्यासाठी पौष्टिक आहार गरजेचा असून, नवीन किचन शेडमुळे भोजन व्यवस्थेत अधिक गुणवत्ता आणि स्वच्छता राखता येईल. योजनेचा लाभ प्रत्येक विद्यार्थ्यापर्यंत पोहोचवण्यासाठी विद्यालयाने चांगली पावले उचलली आहेत.”
डॉ. अमोल खानावरे यांनीही या उपक्रमाचे कौतुक करताना सांगितले की, “विद्यालयाच्या सर्वांगीण प्रगतीसाठी अशी सुविधा अत्यंत आवश्यक आहे. विद्यार्थ्यांच्या आरोग्यवर्धनासाठी मंडळ सदैव तत्पर राहील.”
कार्यक्रमाचे सूत्रसंचालन पल्लवी वाघ यांनी केले, तर उपस्थितांचे आभार प्रा. पाटील यांनी मानले.
उद्घाटनामुळे आता विद्यार्थ्यांसाठी पौष्टिक भोजनाची व्यवस्था अधिक सुसंगत आणि आधुनिक पद्धतीने होणार असून विद्यालयाच्या सुविधा वाढण्यास मोठी मदत होणार आहे.
