पुणे: पुणे (Pune News) जिल्ह्यातील श्री क्षेत्र थेऊर येथे सोमवार, 12 जानेवारी 2026 रोजी द्वारका-शारदा पीठाधीश्वर जगद्गुरू श्री शंकराचार्य सदानंद सरस्वती स्वामीजी यांनी श्री चिंतामणी मंदिरात भेट देऊन गणपतीचे पूजन केले. अष्टविनायक तीर्थक्षेत्रांचे आध्यात्मिक महत्त्व असल्याने भेटीचे विशेष आयोजन करण्यात आले होते. यापूर्वी उत्तरेचे ज्योतिष्पीठाधीश शंकराचार्य श्री अविमुक्तेश्वरानंद सरस्वती स्वामीजी यांनी या मंदिराला भेट दिली होती, आता पश्चिम पीठाचे शंकराचार्य सदानंद सरस्वती थेऊरला भेट दिल्याने या स्थानाचे महत्त्व संपूर्ण भारतात अधिक वाढले आहे.
भारतातील प्रमुख चार पीठांचे शंकराचार्य स्वामीजींनी ही यात्रा करून या स्थानी भेट द्यावी व अष्टविनायकचे महत्त्व अधोरेखित करून जगासमोर मांडावा, यासाठी प्रयत्न सुरु आहे.
या सोहळ्याचे वैशिष्ट्य म्हणजे अष्टविनायकातील ओझर, रांजणगाव, महड, लेण्याद्री आणि पाली या देवस्थानांच्या विश्वस्तांनी एकत्र येत आपली उपस्थिती लावली. इतकेच नव्हे तर आळंदी आणि जेजुरी सारख्या महत्त्वाच्या देवस्थानांचे प्रतिनिधीही एकाच व्यासपीठावर उपस्थित होते.
शंकराचार्य सदानंद सरस्वती यांनी आपण लवकरच संपूर्ण अष्टविनायक यात्रा करणार असल्याचे घोषित केले. जयंत म्हैसकर, प्रसादराव पाटील आणि मंगेश कराड यांच्या सहकार्याने संपन्न झालेला हा दिवस भाविकांसाठी अविस्मरणीय ठरला असून, येत्या काळात इतर पीठांच्या शंकराचार्यांनाही यात्रेसाठी निमंत्रित केले जाणार आहे.
