Pune Crime: पुणे: पुण्यात गुन्हेगारी संपायचं नाव घेत नाही अशातच अन्न आणि औषध प्रशासनाने मोठी कारवाई करत बनावट औषधांच्या विक्रीचा प्रकार उघडकीस आला आहे. सिक्कीममधील एका नामांकित कंपनीच्या नावाने बनावट औषधे तयार करून ती पुणे शहरात विकली जात असल्याचे समोर आले आहे. या प्रकरणी पुण्यातील औषध विक्रेत्यांसह एकूण 8 जणांविरोधात गुन्हा दाखल करण्यात आला असून सुमारे 2 लाख 75 हजार रुपयांची बनावट औषधे जप्त करण्यात आली आहेत.
अन्न व औषध प्रशासनाचे सह आयुक्त गिरीष हुकरे यांनी दिलेल्या माहितीनुसार, सिक्कीम येथील टेरेंट फार्मास्युटिकल्स या कंपनीच्या नावाने तयार केलेल्या ट्रिप्सिन औषधाची पुण्यात विक्री सुरू असल्याची माहिती प्रशासनाला मिळाली होती. त्यानंतर 16 ऑक्टोबर 2025 रोजी औषध निरीक्षकांनी सदाशिव पेठेतील अक्षय फार्मा या मेडिकल दुकानात तपासणी केली. या ठिकाणी औषधांच्या साठ्यातून नमुने घेऊन प्रयोगशाळा तपासणीसाठी पाठवण्यात आले.
तपासादरम्यान धक्कादायक माहिती समोर आली आहे. हे औषध पुण्यातील इतर दोन व्यक्तींकडून आणल्याचे निष्पन्न झाले. या व्यवहाराचे धागेदोरे बिहारपर्यंत पोहोचले. अन्न व औषध प्रशासनाने बिहारमधील गोपालगंज येथील सहाय्यक ड्रग्ज कंट्रोलर यांच्याशी पत्रव्यवहार केला. त्यातून महिवाल मेडिको ही पेढी बंद असून तिचा परवाना 20 नोव्हेंबर 2024 रोजीच संपुष्टात आल्याची माहिती मिळाली.
यानंतर तपास थेट सिक्कीमपर्यंत पोहोचला. टेरेंट फार्मास्युटिकल्स, सिक्कीम यांच्याकडे औषधांचे नमुने पाठवून तुलना करण्यात आली. कंपनीने हे औषध आपण तयार केलेले नसल्याचे लेखी स्वरूपात स्पष्ट केले. या सर्व पुराव्यांच्या आधारे अन्न व औषध प्रशासनाने 2 लाख 75 हजार रुपयांचा बनावट औषधांचा साठा जप्त केला आहे.
या प्रकरणी विश्रामबाग पोलीस ठाण्यात गुन्हा दाखल करण्यात आला असून पोलीस पुढील तपास करत आहेत.
