Pune Crime: पुणे : पुणे जिल्ह्यातून तडीपार करण्यात आलेल्या एका सराईत आरोपीला चाकण (Chakan) परिसरात पोलिसांनी अटक (Arrest) केल्याची घटना समोर आली आहे. तडीपारीचा आदेश असतानाही तो चाकणमध्ये वावरत असल्याची माहिती पोलिसांना मिळाल्यानंतर चाकण उत्तर पोलिसांनी सापळा रचून त्याला ताब्यात घेतले. या प्रकरणी आरोपीविरुद्ध महाराष्ट्र पोलीस अधिनियमांतर्गत गुन्हा दाखल करण्यात आला आहे.
पोलिसांनी दिलेल्या माहितीनुसार रोहन महेंद्र घोगरे (वय 28, रा. आंबेडकर नगर, चाकण) असे अटक करण्यात आलेल्या आरोपीचे नाव आहे. तो पुणे जिल्ह्यातून तडीपार असतानाही चाकण परिसरात फिरत असल्याची माहिती पोलिसांना मिळाली होती. त्यानुसार पोलिसांनी शनिवारी 7 मार्च रोजी परिसरात शोधमोहीम सुरू केली.
दरम्यान चाकण उत्तर पोलीस ठाण्याचे पथक हद्दीत गस्त घालत असताना गुप्त बातमीदाराकडून आरोपी चक्रेश्वर मंदिराकडे जाणाऱ्या रस्त्यावर उभा असल्याची माहिती मिळाली. या माहितीची खात्री करून पोलिसांनी दोन पंचांच्या उपस्थितीत त्या ठिकाणी धाड टाकली. दुपारी सुमारे 2:45 वाजण्याच्या सुमारास आरोपीला ताब्यात घेण्यात आले.
पोलिसांनी त्याची चौकशी केली असता त्याच्याकडे तडीपारीचा आदेश रद्द झाल्याचा किंवा त्या भागात राहण्याचा कोणताही परवाना नसल्याचे समोर आले. त्यामुळे त्याच्याविरुद्ध कायदेशीर कारवाई करण्यात आली आहे.
पिंपरी चिंचवड पोलीस आयुक्तालयाने 28 फेब्रुवारी 2025 रोजीच्या आदेशानुसार आरोपीला महाराष्ट्र पोलीस अधिनियम 1951 च्या कलम 56(1)(ब) अंतर्गत पुणे जिल्ह्याच्या हद्दीतून 2 वर्षांसाठी तडीपार केले होते. या आदेशाचे उल्लंघन केल्यामुळे त्याच्यावर कलम 142 नुसार गुन्हा दाखल करण्यात आला आहे. ही कारवाई पोलीस उपनिरीक्षक चंद्रशेखर मोरखंडे व त्यांच्या पथकाने केली.
