Nashik Bribe Case: पुणे, ता. 10 : फेरफार नोंद मंजूर करण्यासाठी 10 लाखांची लाच मागून तडजोडीअंती अडीच लाखांची स्वीकारताना सिन्नरच्या नायब तहसीलदाराला नाशिकच्या लाचलुचपत प्रतिबंधक विभागाने (ACB) रंगेहाथ पकडले आहे. नाशिक शहरातील सोपान हॉस्पिटलसमोर असलेल्या रोडच्याकडेला बुधवारी (ता.9) केली आहे. या कारवाईमुळे जिल्ह्याच्या महसूल विभागात एकच खळबळ उडाली आहे. Nashik Bribe Case
सजय भिकाजी धनगर (वय 51, रा. के. पी. मार्केट समोर, नाशिक) असे अटक करण्यात आलेल्या नायब तहसीलदाराचे नाव आहे. याप्रकरणी एका व्यक्तीने लाचलुचपत प्रतिबंधक विभागाकडे तक्रार दिली होती.
लाचलुचपत प्रतिबंधक विभागाने दिलेल्या माहितीनुसार, सजय धनगर हे महसूल विभागात सिन्नर वर्ग 2 चे अधिकारी आहेत. तक्रारदारांनी त्यांचा मुलगा व सुनेच्या नावे दोडी खुर्द (ता. सिन्नर, जि. नाशिक) येथील गट क्र. 499 मध्ये 3 हे 60 आर शेतजमीन खरेदी केली होती. खरेदी खतावरून दोडी खुर्द येथील तलाठ्याने सदर फेरफार नोंद क्र.3345 रद्द करण्यासाठी तक्रार दिली आहे. या तक्रारीचा निकाल तक्रारदारांच्या मुलगा व सुनेच्या बाजून लावून सुनावणीसाठी असलेला फेरफार नोंद क्र. 3345 मंजूर करून देण्याच्या मोबदल्यात नायब तहसीलदार संजय धनगर यांनी तक्रारदाराकडे 10 लाख रूपयांच्या लाचेची मागणी केली होती.
मिळालेल्या तक्रारीच्या अनुषंगाने लाचलुचपत प्रतिबंधक विभागाने पडताळणी केली असता, आरोपी लोकसेवक सजय धनगर याने सदर कामांसाठी 10 लाख रुपयांची मागणी करून तडजोडीअंती 2 लाख 50 हजार रूपये लाचेची रक्कम स्विकारण्याचे मान्य केल्याचे तपासात निष्पन्न झाले आहे. लाचलुचपत प्रतिबंधक विभागाने पथकाने मंगळवारी (ता. 9) शहानिशा करून सापळा रचला. तेव्हा तक्रारदार यांच्याकडून 2 लाख 50 हजारांची लाच स्वीकारताना नायब तहसीलदार संजय धनगर यांना रंगेहाथ पकडले. संजय धनगर यांच्यावर मुंबई नाका पोलीस ठाण्यात लाचेचा गुन्हा दाखल करून अटक करण्यात आली आहे.
