Mhada : मुंबईत स्वतःचं घर असावं, हे स्वप्न अनेक मध्यमवर्गीय कुटुंबांच्या आयुष्याचं ध्येय असतं. मात्र, वाढत्या मालमत्ता किमतींमुळे हे स्वप्न अधिकच दूर जात आहे. अशा परिस्थितीत महाराष्ट्र गृहनिर्माण आणि क्षेत्र विकास प्राधिकरण (म्हाडा) ने ‘प्रथम येणाऱ्यास प्राधान्य’ या तत्त्वावर 118 फ्लॅट्स थेट विक्रीसाठी उपलब्ध करून दिले आहेत. याआधी तीन वेळा लॉटरी काढूनही ही घरे न विकली गेल्याने अखेर थेट विक्रीचा मार्ग स्वीकारण्यात आला आहे. 17 फेब्रुवारी 2026 पासून नोंदणी प्रक्रिया सुरू झाली आहे.
या योजनेत घरांच्या किमती 31 लाख रुपयांपासून तब्बल 8 कोटी रुपयांपर्यंत आहेत. सर्वात परवडणारी घरे मानखुर्द परिसरात उपलब्ध आहेत, तर सर्वाधिक किंमतीचे फ्लॅट्स ताडदेव येथील क्रीसेंट टॉवरमध्ये आहेत. याशिवाय वडाळा, लोअर परळ, अंधेरी पश्चिम, कांदिवली, पवई, घाटकोपर, विक्रोळी, भायखळा आणि सायन या भागांमध्येही घरे विक्रीसाठी आहेत. तुंगा पवई येथे सर्वाधिक 42 घरे उपलब्ध असून अँटॉप हिल-वडाळा येथे 27 फ्लॅट्स आहेत. JVPD अंधेरी पश्चिममध्ये 7, ताडदेवमध्ये 6 आणि लोअर परळमध्ये 4 घरे उपलब्ध आहेत.
‘प्रथम येणाऱ्यास प्राधान्य’ या पद्धतीनुसार इच्छुकांनी ऑनलाइन नोंदणी करून फ्लॅट निश्चित करावा लागेल. फ्लॅट निश्चित झाल्यानंतर 48 तासांच्या आत एकूण किमतीच्या 10 टक्के रक्कम भरणे बंधनकारक आहे. उर्वरित रक्कम निश्चित मुदतीत भरावी लागेल.
मुंबईतील वाढत्या किमती आणि मर्यादित उपलब्धता लक्षात घेता, ही संधी अनेकांसाठी महत्त्वाची ठरू शकते. विशेषतः लॉटरीत वारंवार अपयश आलेल्या अर्जदारांना थेट विक्रीची ही पद्धत अधिक पारदर्शक आणि वेगवान पर्याय देणारी आहे. मात्र, कमी कालावधीची देयक अट लक्षात घेता आर्थिक तयारी करूनच अर्ज करणे आवश्यक आहे.
