नागपूर : नागपूरमधील बाजारगव येथील सोलार एक्सप्लोसिव्ह कंपनीच्या प्लांटमध्ये मध्यरात्री 12:30 वाजता भीषण स्फोट झाला. PP 15 मधील CB 1 प्लॅन्टमध्ये घडलेल्या या दुर्घटनेत एका व्यक्तीचा जागीच मृत्यू झाला, तर 17 जण जखमी झाले. यापैकी सहा जणांची प्रकृती गंभीर असून, त्यांच्यावर आयसीयूमध्ये उपचार सुरू आहेत. या प्लांटमध्ये HMX, TNT आणि RDX यांसारख्या स्फोटक पदार्थांची निर्मिती केली जाते. जखमींना डोक्याला, हाताला आणि पायाला गंभीर दुखापत झाली आहे.
मध्यरात्री काम सुरू असताना प्लांटमधून धूर निघत असल्याचे कर्मचाऱ्यांच्या लक्षात आले. त्यानंतर तातडीने कामगारांना बाहेर काढण्यात आले, ज्यामुळे मोठी दुर्घटना टळली. मात्र, स्फोटाच्या काही अंतरावर RDX लॅबमध्ये काम करणाऱ्या मयूर नावाच्या व्यक्तीचा मृत्यू झाला. स्फोट इतका तीव्र होता की, इमारतीचा मलबा आणि सिमेंटचे तुकडे ७०० ते ८०० मीटर अंतरापर्यंत फेकले गेले. मयूरच्या मृत्यूचे कारण डोक्याला मोठा दगड लागल्याने झाला असल्याचे सांगितले जात आहे. हा स्फोट इतका भयंकर होता की, प्लांटपासून ५०० मीटर अंतरावर असलेल्या दुसऱ्या प्लांटमधील कर्मचारीही उडालेल्या मलब्यामुळे जखमी झाले.
सोलार एक्सप्लोसिव्ह ही दारुगोळा आणि स्फोटक पदार्थ बनवणारी नामांकित कंपनी आहे. यापूर्वी 17 डिसेंबर 2023 रोजीही याच प्लांटमध्ये असाच स्फोट झाला होता, ज्यामध्ये नऊ जणांचा मृत्यू झाला होता. दोन वर्षांत पुन्हा एकदा अशीच भयानक दुर्घटना घडल्याने या प्लांटच्या सुरक्षाव्यवस्थेवर प्रश्नचिन्ह उपस्थित झाले आहे.
दरम्यान, स्फोटाच्या कारणांचा तपास सुरू आहे. प्राथमिक माहितीनुसार, प्लांटमधील तांत्रिक बिघाड किंवा सुरक्षेच्या नियमांचे उल्लंघन यामुळे ही दुर्घटना घडली असावी, अशी शक्यता वर्तवली जात आहे.
