लोणी काळभोर, (पुणे): लोणी काळभोर पोलिसांनी अवैध जुगार अड्ड्यावर मोठी कारवाई करत तब्बल 5 लाख 43 हजार 10 रुपयांचा मुद्देमाल जप्त केला. या धाडसी कारवाईत पोलिसांनी 11 जणांना ताब्यात घेतले आहे. हि कारवाई लोणी काळभोर (ता. हवेली) ग्रामपंचायत हद्दीतील माळी मळा परिसरातील गुरुकृपा निवास येथील छतावर पत्र्याच्या शेडमध्ये करण्यात आली आहे. या कारवाईने परिसरातील नागरिकांमध्ये खळबळ उडाली आहे. (loni kalbhor news)
या प्रकरणी जुगार अड्डा चालविणाऱ्या कानीफनाथ जगदाळे, जागेचे घरमालक अरुण काळे, सचिन सोपान सकट (वय-20), विशाल हंसराज गुप्ता (वय -25), मंगेश पुंडलीक शिंदे (वय 29), गणेश लक्ष्मण सानप (वय 38) योगेश कैलास चौधरी (वय-37), अर्जुन पन्नालाल येरवल (वय 28), अहमद शब्बीर मोगल (वय -40), विवेक मधुकर काळभोर (वय -48), शब्बीर हाजीमियाँ शेख (वय -29) अल्फाज अलीम शेख (वय-21) सवाजी वामन पवार (वय 29, रा. सर्व लोणी काळभोर ता. हवेली) अशी गुन्हा दाखल करण्यात आलेल्यांची नावे आहेत. लोणी काळभोर पोलिसांनी त्याच्याविरुद्ध महाराष्ट्र जुगार प्रतिबंध अधिनियम कलम 4(5) प्रमाणे गुन्हा दाखल करण्यात आला आहे.
पोलिसांनी दिलेल्या माहितीनुसार, लोणी काळभोर पोलिसांचे पथक सोमवारी (ता. 08) लोणी काळभोर पोलीस ठाण्याच्या हद्दीत गस्त घालीत असताना रात्री आठ वाजण्याच्या सुमारास लोणी काळभोर येथील माळी मळा परिसरात छतावर पत्र्याच्या शेडमध्ये पैशांवर जुगार खेळला जात असल्याची माहिती पोलिसांना एका खबऱ्याकडून मिळाली होती.
मिळालेल्या माहितीनुसार, सदर ठिकाणी वरिष्ठ पोलीस निरीक्षक राजेंद्र पन्हाळे, सहायक पोलीस निरीक्षक कृष्णा बाबर, पोलीस उप निरीक्षक सर्जेराव बोबडे व त्यांच्या पथकाने छापा कारवाई करीत 11 इसमांना ताब्यात घेतले. यावेळी त्या ठिकाणी असलेले जुगाराचे साहित्य, रोख रक्कम, मोबाईल हॅन्डसेट व जुगाराच्या अड्डयावर येण्यासाठी वापरलेली 5 दुचाकी वाहनांसह तब्बल 5 लाख 43 हजार 10 रुपयांचा मुद्देमाल जप्त केला. याप्रकरणी वरील 11 जणांवर लोणी काळभोर पोलीस ठाण्यात गुन्हा दाखल करण्यात आला आहे.
दरम्यान, वरिष्ठ पोलीस निरीक्षक राजेंद्र पन्हाळे यांनी लोणी काळभोर पोलीस ठाण्याचा कार्यभार स्विकारल्यापासुन 103 अवैध दारु धंद्यावर, 14 गांजा विक्रीवर, 36 अवैध जुगारांवर, अवैध गुठखा विक्री, वाहतुक व साठा धारकावर 1 अशा एकुण 154 प्रभावी कारवाया केल्या आहेत. त्याचप्रमाणे अवैध मटका चालविणाऱ्या 2 इसमांविरुध्द एम.पी.डी.ए. कारवाई केली असुन 1 अवैध जुगार चालकास तडीपार केले आहे.
दरम्यान, अवैध दारु विक्रेत्या एका महिलेस देखील तडीपार करण्यात आले आहे. यापुढे देखील प्रभावी कारवाया करुन अवैध धंद्यांचे लोणी काळभोर हद्दीतुन समूळ उच्चाटन करणार असल्याचे पोलीस निरीक्षक राजेंद्र पन्हाळे यांनी यावेळी सांगितले.
