Kolhapur : पुणे-बंगळुरू राष्ट्रीय महामार्गावर टोप गावाजवळ झालेल्या एका भीषण अपघातात एका तरुण विवाहितेचा दुर्दैवी मृत्यू झाला आहे. बुधवारी रात्री बिरदेव मंदिरासमोर हा अपघात झाला. दुचाकीवर मागे बसलेल्या सोनाली उर्फ सोनिया कांबळे (वय २३, रा. बुवाचे वाठार) यांना मागून येणाऱ्या ट्रकने जोरात धडक दिली. धडकेनंतर सोनाली ट्रकच्या चाकाखाली ओढली गेल्याने ती गंभीर जखमी झाली. तिला तातडीने सीपीआर रुग्णालयात दाखल करण्यात आलं, मात्र उपचारादरम्यान गुरुवारी रात्री उशिरा तिचा मृत्यू झाला. (Kolhapur)
या अपघातावेळी दुचाकीवर सोनालीसोबत तिचा दीड वर्षांचा मुलगा आणि दुचाकी चालवत असलेले मोहसिन पिंजारी हे होते. अपघातात मोहसिन जखमी झाले असून त्यांच्यावर सीपीआर रुग्णालयात उपचार सुरू आहेत. सुदैवाने लहान मुलगा थोडक्यात बचावला. अपघातानंतर ट्रकचालक घटनास्थळावरून फरार झाला होता, मात्र शिरोली एमआयडीसी पोलिसांनी तपास करत ट्रकचालक विनोद ओव्हाळ याला अटक केली आहे. त्याच्याविरोधात निष्काळजीपणे वाहन चालवून मृत्यूस कारणीभूत ठरल्याचा गुन्हा दाखल करण्यात आला आहे.
दरम्यान, सोनालीच्या मृत्यूनंतर सीपीआर रुग्णालयात सासर आणि माहेरच्या नातेवाइकांमध्ये मोठा तणाव निर्माण झाला. काही वेळ हाणामारीही झाली, त्यामुळे पोलिसांना हस्तक्षेप करावा लागला. या गोंधळात सोनालीचा पती शुभम कांबळे यालाही मारहाण झाल्याचं पोलिसांनी सांगितलं. या घटनेमुळे बुवाचे वाठार परिसरात हळहळ व्यक्त होत असून, एका तरुण आईचा जीव गेल्याने कांबळे कुटुंबावर दुःखाचा डोंगर कोसळला आहे. महामार्गावर वारंवार होणाऱ्या अपघातांमुळे नागरिकांनी प्रशासनाकडे ठोस सुरक्षा उपाययोजना करण्याची मागणी केली आहे.
