जेजुरी: जामीनपात्र वॉरंट करून देण्यासाठी 2 हजार (Jejuri News) रुपयांची लाच मागितल्या प्रकरणी जेजुरी पोलीस ठाण्यातील पोलीस हवालदारासह खाजगी इसमावर लाचेचा गुन्हा दाखल करण्यात आला आहे. लाचलुचपत प्रतिबंधक विभागाने जेजुरी (ता. पुरंदर) पोलीस ठाण्यात आज बुधवारी (ता.17) गुन्हा दाखल केला आहे.
दशरथ शिवाजी बनसोडे (वय 57, पोलीस हवालदार, साळुंखे बिल्डिंग, बडोदा बैंकेच्या शेजारी, मोरगाव रोड, जेजुरी ता. पुरंदर जि. पुणे (वर्ग 3) व खाजगी इसम सचिन अरविंद चव्हाण (रा. चव्हाण वस्ती, वाल्हा, ता. पुरंदर जि. पुणे) अशी गुन्हा दाखल करण्यात आलेल्या दोघांची नावे आहेत. याप्रकरणी एका 59 वर्षीय व्यावसायिकाने पुणे एसीबीकडे तक्रार केली होती.
लाचलुचपत प्रतिबंधक विभागाने दिलेल्या माहितीनुसार, तक्रारदार हे एक कापड व्यावसायिक आहेत. तक्रारदार यांच्या मुलाने सन 2019 मध्ये एका इसमाविरोधात जेजुरी पोलीस ठाणे येथे सावकारकीच्या कायद्याखाली गुन्हा दाखल केला होता. त्या गुन्ह्यामध्ये तक्रारदार व तक्रादाराची पत्नी असे दोन साक्षीदार होते.
दरम्यान, पोलीस हवालदार दशरथ बनसोडे व खाजगी इसम सचिन चव्हाण हे तक्रारदाराच्या घरी आले होते तेव्हा त्यांनी तक्रारदार व तक्रारदाराची पत्नी विरुद्ध सन 2019 मध्ये तक्रारदाराच्या मुलाने दाखल केलेल्या गुन्ह्यामध्ये गेट वॉरंट निघाले असून ते रद्द करण्यासाठी दोन हजार रुपयाची लाच मागितली होती. याप्रकरणी तक्रारदार यांनी लाचलुचपत प्रतिबंधक विभागाकडे तक्रार केली होती.
मिळालेल्या तक्रारीच्या अनुषंगाने लाचलुचपत प्रतिबंधक विभागाने पडताळणी केली असता, आरोपी लोकसेवक पोलीस हवालदार बनसोडे यांनी तक्रारदाराकडे त्यांच्या व त्यांची पत्नी विरुद्ध निघालेले जामीनपात्र वॉरंट रद्द करून देण्यासाठी 2 हजार रुपयाची लाच मागितल्याचे निष्पन्न झाले आहे. तसेच खाजगी इसम सचिन चव्हाण याने तक्रारदारास लाच देण्यासाठी प्रोत्साहन दिल्याचे निष्पन्न झाले आहे. दोघांच्या विरोधात जेजुरी पोलीस ठाण्यात भ्रष्टाचार प्रतिबंधक अधिनियम 1988 चे कलम 7,71, 12 नुसार गुन्हा दाखल करण्यात आला आहे. पुढील तपास पुणे लाचलुचपत प्रतिबंधक विभागाच्या पोलीस निरीक्षक शैलजा शिंदे करत आहेत.
