पुणे : चीनच्या पूर्व किनारपट्टीवर ‘बावी’ नावाच्या अत्यंत धोकादायक चक्रीवादळाने तीव्र धडक दिली आहे. याआधी आलेल्या ‘मेसॅक’ वादळाच्या संकटानंतर लगेचच आलेल्या या नव्या वादळाने चीन आणि तैवानमध्ये प्रचंड धुमाकूळ घातला आहे. शनिवारी रात्री हे चक्रीवादळ सुमारे 144 किलोमीटर प्रतितास या वेगाने चीनच्या झेजियांग प्रांताच्या किनाऱ्यावर धडकले. या वादळाच्या तीव्रतेमुळे तब्बल 650 हून अधिक विमानांची उड्डाणे रद्द करण्यात आली आहेत.
या’ बावी ‘वादळामुळे निर्माण झालेल्या मुसळधार पावसामुळे आणि वेगवान वाऱ्यांमुळे अनेक ठिकाणी पूर आले असून दरडी कोसळण्याच्या घटना घडल्या आहेत.या महाभयंकर नैसर्गिक आपत्तीचा अंदाज घेऊन चीन प्रशासनाने तातडीने सुरक्षा उपाययोजना राबवल्या. संभाव्य धोका टाळण्यासाठी प्रशासनाने प्रभावित भागातील जवळपास 20 लाख लोकांना सुरक्षित स्थळांवर हलवले आहे.
यामध्ये एकट्या झेजियांग प्रांतातून 17 लाख, शांघायमधून 34 हजार, तर फुझियान प्रांतातून 1लाखापेक्षा जास्त नागरिकांचे स्थलांतर करण्यात आले आहे. या वादळाचे स्वरूप पाहता यंदाच्या वर्षातील हे सर्वात विनाशकारी वादळ मानले जात आहे.सुरक्षेचा उपाय म्हणून वाहतूक आणि जनजीवन पूर्णपणे थांबवण्यात आले आहे.
वादळाच्या तीव्रतेमुळे तब्बल 650 हून अधिक विमानांची उड्डाणे रद्द करण्यात आली आहेत. यामध्ये भारत आणि चीन दरम्यान प्रवास करणाऱ्या विमानांचाही समावेश आहे. याशिवाय हाय-स्पीड ट्रेन सेवा पूर्णपणे विस्कळीत झाली असून, सर्व शाळा आणि महाविद्यालये खबरदारी म्हणून बंद ठेवण्यात आली आहेत. अनेक देशांना या वादळामुळे मोठ्या आर्थिक नुकसानाचा सामना करावा लागण्याची शक्यता वर्तवली जात आहे.
