gold silver rate today : मध्यपूर्वेत सुरू असलेल्या इराण–इस्रायल–अमेरिका तणावाचा परिणाम आता थेट भारतीय बाजारपेठांवर दिसू लागला आहे. गेल्या सुमारे 1 महिन्यापासून सुरू असलेल्या या भू-राजकीय तणावामुळे गुंतवणूकदार सुरक्षित पर्यायांकडे वळत आहेत, आणि त्यामुळेच सोनं-चांदीच्या दरात मोठ्या प्रमाणावर चढ-उतार सुरू आहेत.
युद्धाचा धोका वाढला की सोनं हे “सेफ हेवन” म्हणून ओळखलं जातं. त्यामुळे सुरुवातीला सोन्याच्या किंमतींनी विक्रमी झेप घेतली आणि काही बाजारांत 2 लाख रुपयांच्या पातळीचा उल्लेखही चर्चेत आला. मात्र, परिस्थितीत थोडा स्थैर्याचा संकेत मिळताच दर घसरले. आता अमेरिकेने पुढील 10 दिवस, म्हणजे 6 एप्रिलपर्यंत इराणवर हल्ला होणार नसल्याचे संकेत दिल्यानंतर पुन्हा एकदा सोन्याच्या दरात तेजी दिसू लागली आहे.
आज 28 मार्च रोजी देशांतर्गत बाजारात सोन्याचे दर पुन्हा वाढले. दिल्लीमध्ये 24 कॅरेट सोन्याचा दर 10 ग्रॅमसाठी 1,44,870 रुपये झाला आहे, तर 22 कॅरेट सोनं 1,32,810 रुपयांवर व्यवहार करत आहे. मुंबई, चेन्नई आणि कोलकाता येथे 24 कॅरेट सोनं 1,44,720 रुपये प्रति 10 ग्रॅम, तर 22 कॅरेट 1,32,660 रुपये आहे. पुणे आणि बंगळुरूमध्येही जवळपास हेच दर कायम आहेत.
महत्त्वाचं म्हणजे, केवळ एका दिवसापूर्वीच सोन्याच्या दरात मोठी घसरण झाली होती. दिल्लीमध्ये 10 ग्रॅममागे तब्बल 1,900 रुपयांची म्हणजे सुमारे 1.3% घसरण नोंदवली गेली होती. यावरून बाजारातील अस्थिरता किती तीव्र आहे, हे स्पष्ट होते.
आंतरराष्ट्रीय स्तरावरही सोन्याचा स्पॉट दर 4,416 डॉलर प्रति औंसवर पोहोचला आहे. डॉलर मजबूत होत असताना आणि व्याजदर कपातीची शक्यता कमी होत असताना सोन्याच्या दरावर दबाव येतो. पण युद्धजन्य परिस्थिती हा दबाव काही प्रमाणात संतुलित ठेवत आहे.
चांदीबाबत चित्र थोडं वेगळं आहे. 28 मार्च रोजी चांदीचा दर 2,39,900 रुपये प्रति किलो झाला असला, तरी त्याआधीच्या दिवशी 11,250 रुपयांची म्हणजे सुमारे 5% मोठी घसरण झाली होती. सध्या आंतरराष्ट्रीय बाजारात चांदीचा भाव 68.12 डॉलर प्रति औंस आहे. जानेवारी 2026 मध्ये चांदीने 4 लाख रुपयांचा टप्पा ओलांडला होता, त्यामुळे सध्याचे दर तुलनेने खाली आलेले दिसतात.
