पुणे: पुण्यातील कुख्यात गुंड गजा मारणे (Gaja Marane) याला अटक करून सांगली कारागृहात (Pune News) नेत असताना निष्काळजीपणा (Pune Crime) आणि विशेष वागणूक दिल्याप्रकरणी पुणे पोलीस दलातील पाच पोलिस कर्मचाऱ्यांवर कठोर कारवाई करण्यात आली आहे. एका सहाय्यक पोलीस फौजदारासह चार पोलिस कर्मचाऱ्यांच्या दोन वर्षांची वेतनवाढ रोखण्याचा आदेश देण्यात आला आहे. या प्रकारामुळे पोलीस दलात खळबळ उडाली आहे. (Breaking News)
प्रवासादरम्यान हलगर्जीपणा
मिळालेल्या माहितीनुसार, काही महिन्यांपूर्वी पुणे पोलिसांनी गुंड गजा मारणे याला अटक केली होती. त्यानंतर त्याला सांगली कारागृहात हलवण्यासाठी पुणे पोलिसांचे एक पथक शासकीय वाहनातून निघाले होते. या प्रवासादरम्यान पोलिसांनी गंभीर हलगर्जीपणा केल्याचे समोर आले आहे.
ढाब्यावरून बिर्याणी आणून दिली
सांगलीकडे जात असताना शासकीय वाहन सातारा जिल्ह्यातील कणसे ढाब्यावर थांबले. यावेळी वाहनातील पोलीस कर्मचारी जेवणासाठी खाली उतरले. या संधीचा फायदा घेत गजा मारणे टोळीतील काही साथीदार पोलिसांच्या गाडीजवळ आले आणि त्यांनी थेट गाडीत बसून मारणेशी भेट घेतली. याच वेळी एका अनोळखी व्यक्तीने ढाब्यावरून बिर्याणी आणून गाडीत मारणेला दिली.
मित्रांच्या गाठीभेटी
धक्कादायक बाब म्हणजे या ठिकाणी मारणेची ओळख असलेले अनेक लोक उपस्थित असतानाही पोलिसांनी त्यांना थांबवले नाही किंवा भेटीस मज्जाव केला नाही. गुन्हेगाराला दिलेली ही विशेष वागणूक आणि कर्तव्यातील निष्काळजीपणा वरिष्ठ अधिकाऱ्यांच्या लक्षात आल्यानंतर तातडीने चौकशीचे आदेश देण्यात आले.
हेही वाचा: सोन्याचा मोह पडला महागात! ’25 लाखांत अर्धा तोळे सोनं देतो’ म्हणाला अन् महिलेने पैसे दिल्यावर लगेचच…
वेतनवाढ रोखण्याची शिक्षा
चौकशीत संबंधित पोलिस कर्मचाऱ्यांनी कर्तव्यात कसूर केल्याचे स्पष्ट झाले. त्यानंतर पुणे पोलीस दलातील एका सहाय्यक पोलीस फौजदारासह चार पोलिस कर्मचाऱ्यांवर दोन वर्षांची वेतनवाढ रोखण्याची शिक्षा ठोठावण्यात आली आहे. या कारवाईमुळे पोलिस कर्मचाऱ्यांना कर्तव्यात कसूर केल्यास कठोर परिणाम भोगावे लागतील, असा स्पष्ट संदेश देण्यात आला आहे.
