Dombivli Crime : ठाणे जिल्ह्यातील डोंबिवलीत योग प्रशिक्षक तरुणीवर लैंगिक अत्याचार झाल्याची आणि तिला जादूटोणा करून कुटुंबाला संपवण्याची धमकी दिल्याचा एक अत्यंत धक्कादायक प्रकार उघडकीस आला आहे. आरोपीने पीडितेचे अश्लील व्हिडिओही बनवले आणि तिच्याशी बळजबरीने तिसरे लग्न केले. याप्रकरणी मुख्य आरोपीसह त्याच्या संपूर्ण कुटुंबावर डोंबिवली पोलीस ठाण्यात गुन्हा दाखल करण्यात आला आहे. (mumbai latest crime news)
संपूर्ण कुटुंबावर गुन्हा दाखल
मुख्य आरोपीचे नाव इम्रान शेख ऊर्फ छोटेबाबा असे आहे. त्याला मदत केल्याप्रकरणी त्याचे वडील सुभान शेख (ऊर्फ नारीयलवाला बाबा/बडेबाबा) , आई सगिरा , बहीण हुसैना आणि मेहुणा फक्रुद्दीन अशा एकूण पाच जणांवर गुन्हा दाखल करण्यात आला आहे.
नेमकं काय घडलं?
पीडिता 29 वर्षीय तरुणी योग प्रशिक्षक आहे. तिचे आई-वडील आर्थिक अडचणी आणि समस्या सोडवण्यासाठी मुंब्रा दत्तूवाडी येथे राहणाऱ्या सुभान शेख ऊर्फ ‘बडेबाबा’ याच्याकडे जात असायचे. त्याचा मुलगा इम्रान शेख याला ‘छोटेबाबा’ म्हणून ओळखला जात असायचा.
पीडितेच्या कुटुंबाच्या भेटींचा फायदा घेत ‘छोटेबाबा’ इम्रानने तरुणीला खासगी योगा क्लास घे असे सांगितले. याच बहाण्याने त्याने ‘आपल्या मित्राला योगा शिकायचा आहे’ असे सांगून पिडीतेला मित्राच्या घरी बोलावले. मित्राच्या घरी नेत त्याने पीडितेवर लैंगिक अत्याचार केले. तसेच या घृणास्पद कृत्याचे अश्लील व्हिडिओ शूट केले.
जादूटोणा आणि धमकी
आरोपीने एवढ्यावरच न थांबता त्याने घडलेल्या प्रकाराबाबत कोणाकडे वाच्यता केलीस तर जीवे मारण्याची धमकी दिली. तसेच जादूटोणा करून तिच्या कुटुंबाला संपवून टाकण्याचीही धमकी दिली. पिडीतेशी बळजबरीने लग्नही केले. विशेष म्हणजे आरोपी इम्रानचे यापूर्वीच दोन लग्न झालेली असतानाही त्याने पिडीतेसोबत तिसरे लग्न केले आहे. या सर्व कटकारस्थानात इम्रानचे संपूर्ण कुटुंब सामील असल्याचा आरोप पीडितेने केला आहे.
दरम्यान, पीडित तरुणीने डोंबिवली पोलीस ठाण्यात धाव घेतली. घडलेला सर्व अनुचित प्रकार सागितला. याप्रकरणी पोलिसांनी सर्व पाच आरोपींवर विविध गंभीर कलमांन्वये गुन्हा दाखल केला आहे. पोलीस या प्रकरणाचा अधिक तपास करत आहेत.
