Dhule News: धुळे : धुळे जिल्ह्यातील शिरपूर तालुक्यात एक भीषण घटना घडली. एका मारुती कारला अचानक आग (car burning) लागल्याने चालकाचा होरपळून मृत्यू झाला आहे. या घटनेत चालक पूर्णपणे जळून खाक झाला असून कारमध्ये केवळ सांगाडा शिल्लक राहिल्याने परिसरात एकच खळबळ उडाली आहे. ही घटना अपघात आहे की घातपात, याचा तपास सध्या पोलीस करत आहेत.
शिरपूर तालुक्यातील खामखेडा गावालगत असलेल्या रस्त्याच्या कडेला ही कार जळालेल्या अवस्थेत आढळून आली. स्थानिक नागरिकांच्या निदर्शनास ही कार आल्यानंतर त्यांनी तातडीने पोलिसांना माहिती दिली. घटनास्थळी पोलीस दाखल झाले असता कार पूर्णपणे जळून खाक झालेली होती. कारच्या चालकाचा मृतदेह ओळखू येण्यासारखा नसून केवळ सांगाडा आढळून आला.
मृत चालकाचे नाव चंद्रकांत धिवरे असे असून ते मूळचे खामखेडा गावचे रहिवासी होते. ते सध्या सुरत येथे वास्तव्याला होते. चंद्रकांत धिवरे हे सुरतहून आपल्या मूळ गावी खामखेडा येथे कारने येत असताना ही दुर्घटना घडल्याचे प्राथमिक तपासात समोर आले आहे. मात्र कारला आग कशी लागली, याबाबत अद्याप कोणतीही ठोस माहिती समोर आलेली नाही.
या घटनेत स्टेरिंगवर बसलेले चंद्रकांत धिवरे हे आगीत अडकले गेले आणि त्यांचा जागीच होरपळून मृत्यू झाला. आगीची तीव्रता इतकी होती की कार पूर्णपणे जळून गेली. त्यामुळे ही आग अचानक लागली की कारमध्ये आधीच काही तांत्रिक बिघाड होता, अथवा कोणीतरी जाणीवपूर्वक आग लावली का, या सर्व शक्यतांचा विचार पोलीस करत आहेत.
घटनेची नोंद संबंधित पोलीस ठाण्यात करण्यात आली असून फॉरेन्सिक तपासणीसह अधिक चौकशी सुरू आहे. या घटनेमुळे खामखेडा आणि परिसरात शोककळा पसरली असून नागरिकांमध्ये भीतीचे वातावरण आहे.
