पुणे: वैचारिक मतभेद आणि स्वभावातील फरकामुळे विभक्त होण्याचा निर्णय घेतलेल्या एका दाम्पत्याचा घटस्फोट पुणे कौटुंबिक न्यायालयाने अवघ्या 49 दिवसांत मंजूर केला आहे. कौटुंबिक न्यायालयाने दाखवलेल्या या विशेष तत्परतेमुळे या प्रकरणाचा वेगाने निकाल लागला.
मिळालेल्या माहितीनुसार, माधुरी आणि रमेश (बदललेली नावे) यांचा विवाह 3 वर्षांपूर्वी मोठ्या उत्साहात पार पडला होता. परंतु, लग्नानंतर काही दिवसांतच त्यांच्यात मतभेद सुरू झाले. दोघांच्या आवडीनिवडी, विचारसरणी आणि व्यक्तिमत्त्वात मोठा फरक असल्याने त्यांच्यात दुरावा वाढत गेला. स्वभावातील या अंतरामुळे एकत्र राहणे कठीण झाल्याने शेवटी त्यांनी वेगळे होण्याचा विचार केला.
दोन्ही कुटुंबातील सदस्यांनी आणि पालकांनी पुढाकार घेऊन त्यांच्यातील वाद मिटवण्याचा व त्यांना एकत्र आणण्याचा खूप प्रयत्न केला. मात्र, वैचारिक फरक जास्त असल्याने सर्व प्रयत्न अपयशी ठरले. अखेर कोणत्याही वादाशिवाय, दोघांनीही परस्पर संमतीने कायदेशीररीत्या वेगळे होण्याचा मार्ग निवडला.
त्यानंतर त्यांनी वकील विजय ललवानी यांच्याद्वारे पुणे कौटुंबिक न्यायालयात आपसी संमतीने घटस्फोटासाठी अर्ज सादर केला. नियमानुसार न्यायालयाने सुरुवातीला त्यांच्यात समुपदेशन करून तडजोड घडवून आणण्याचा प्रयत्न केला. परंतु, दोन्ही पक्षांनी एकत्र संसार करणे शक्य नसल्याचे न्यायालयाला स्पष्टपणे सांगितले.
दोघांचीही एकच भूमिका आणि परस्पर संमती विचारात घेऊन न्यायालयाने सर्व बाजू समजून घेतल्या व अर्ज मंजूर केला. यामुळे अवघ्या 49 दिवसांत त्यांच्या अर्जावर कायदेशीर शिक्कामोर्तब झाले आणि 3 वर्षांच्या या नात्याला अधिकृतपणे पूर्णविराम मिळाला.
