लोणी काळभोर : लोणी काळभोर (ता. हवेली) येथील तीर्थक्षेत्र रामदरा ते हडपसर यासह जिल्ह्यातील ग्रामीण भागातील १२ मार्गावरील बससेवा आज शनिवार (ता.३) पासून बंद करण्याचा निर्णय पुणे महानगर परिवहन महामंडळाने घेतला आहे.
महाराष्ट्र राज्य मार्ग परिवहन महामंडळाच्या कर्मचाऱ्यांनी मागील काही महिन्यांपूर्वी संप घेतला होता. त्या कालावधीत प्रवास्यांच्या सेवेसाठी पुणे महानगर परिवहन महामंडळाने नव्याने बससेवा सुरु केली होती. या ग्रामीण भागात नव्याने सुरू करण्यात आलेल्या बस मार्गांच्या संचालनासाठी येत असलेल्या खर्च व या मार्गांपासून मिळणारे उत्पन्न यामध्ये मोठी तफावत दिसून येत आहे. त्यामुळे पीएमपीएमएलने ही बस सेवा बंद करण्याचा निर्णय घेतला आहे.
तसेच पीएमपीएमएल कडून महाराष्ट्र राज्य मार्ग परिवहन महामंडळात ग्रामीण भागातील ४० बस मार्गावर पूर्ववत वाहतूक सेवा सुरू करण्याबाबत कळविण्यात आले होते.
महाराष्ट्र राज्य मार्ग परिवहन महामंडळाकडून ४० बस मार्गांपैकी ११ मार्गांवर बस सेवा सुरू असल्याचे कळविण्यात आले आहे. त्या अनुषंगाने ग्रामीण भागातील ११ बस मार्ग २६ नोव्हेंबर २०२२ पासून बंद करण्यात आले आहेत. तसेच पीएमपीएमएल अध्यक्ष व व्यवस्थापकीय संचालक यांच्या आदेशानुसार ग्रामीण भागातील १२ बस मार्ग बंद करण्याचे आदेश दिले आहेत.
दरम्यान, सर्व संबंधित आगार व्यवस्थापक यांना ग्रामीण भागातील बस मार्ग बंद करण्याबाबतची कार्यवाही आज ३ डिसेंबर पासून करण्यात यावी अशा सूचना पीएमपीएमएलने दिल्या आहेत. त्यामुळे लोणी काळभोर येथील तीर्थक्षेत्र रामदरा ते हडपसर यासह जिल्ह्यातील ग्रामीण भागातील १२ मार्गावरील बससेवा आजपासून बंद करण्यात आली आहे.
बंद झालेले १२ बससेवा मार्ग पुढीलप्रमाणे :
१) हिंजवडी शिवाजी चौक : घोटावडे फाटा
२) पुणे स्टेशन: पौड एसटी स्टँड
३) एनडीए गेट नंबर 10: सिम्बॉयसिस नर्सिंग सुसगाव
४) (बी.आर.टी): वाघोली रांजणगाव सांडस
५)भेकराईनगर: तळेगाव ढमढेरे
६) शिक्रापूर एसटी स्टँड लोणी धामणी७) शिक्रापूर एसटी स्टँड: न्हावरे
८) हडपसर: रामदरा लोणी काळभोर
९) कात्रज : वडगाव मावळ
१०) भोसरी : पाबळगाव
११)चिंचवडगाव खांबोली कातरखडक
१२)निगडी : लोणावळा रेल्वे स्टेशन
