Beed News : बीड जिल्ह्यातील शिरूर कासार शहरात एका खासगी रुग्णालयातील डॉक्टरांच्या निष्काळजीपणामुळे 13 वर्षांच्या मुलीचा मृत्यू झाल्याचा आरोप तिच्या कुटुंबीयांनी केला आहे. या घटनेमुळे शहरात संतापाचं वातावरण असून, नागरिक आणि नातेवाईक रस्त्यावर उतरले आहेत. (beed news)
नेमकं काय घडलं?
मृत मुलीचं नाव संस्कृती संजय बारगजे असं आहे. तिला उलटीचा त्रास होत असल्याने शिरूरमधील गुरुदत्त रुग्णालयात दाखल करण्यात आलं होतं. दोन दिवस तिच्यावर उपचार सुरू होते. मात्र 3 नोव्हेंबरच्या मध्यरात्री अचानक तिला श्वास घेण्यास त्रास होऊ लागला. कुटुंबीयांचा आरोप आहे की, ही परिस्थिती गंभीर असतानाही डॉक्टरांनी वेळीच योग्य उपचार केले नाहीत आणि त्याचमुळे तिचा मृत्यू झाला.
संस्कृतीच्या मृत्यूसाठी गुरुदत्त रुग्णालयातील डॉ. प्रशांत ढाकणे जबाबदार असल्याचा आरोप तिच्या आई-वडिलांनी केला आहे. या घटनेनंतर संतप्त झालेल्या नागरिकांनी आणि नातेवाईकांनी शहरातील मुख्य चौकात ठिय्या आंदोलन करत डॉक्टरांविरोधात जोरदार घोषणाबाजी केली.
या प्रकरणी पालकांनी डॉक्टरांविरुद्ध तक्रार दाखल केली असली, तरी महिनाभर उलटूनही कोणतीही ठोस कारवाई झालेली नाही, असा त्यांचा आरोप आहे. त्यामुळे आता न्याय मिळेपर्यंत तहसील कार्यालयासमोर धरणे आंदोलन सुरू करण्यात आलं आहे.
दरम्यान, या आरोपांबाबत विचारणा केली असता डॉ. प्रशांत ढाकणे यांनी प्रतिक्रिया देण्यास नकार दिला. “मला न्यायव्यवस्थेवर विश्वास आहे,” असं सांगत त्यांनी बोलणं टाळलं.
या घटनेची सखोल चौकशी करून पीडित कुटुंबाला लवकर न्याय मिळावा, अशी मागणी शिरूर कासारमधील नागरिकांकडून होत आहे.
