शिरूर : दाणेवाडी(ता.श्रीगोंदा,जि.अ.नगर) येथील ग्रामस्थांनी बोलावलेल्या विशेष ग्रामसभेमध्ये मोठ्या संख्येने उपस्थित ग्रामस्थांनी प्रशासनाचा तीव्र शब्दांमध्ये निषेध व्यक्त केला.तसेच येथे उघड झालेल्या क्रूर खूनाचा छडा पोलिसांनी तातडीने लावावा व बेपत्ता युवक माऊली गव्हाणे याचा शोध जलद गतीने पूर्ण करावा.अशी संतप्त मागणी विशेष ग्रामसभेमध्ये ग्रामस्थांनी केली.
शुक्रवारी(दि.१४)सायंकाळी दाणेवाडी येथील जिल्हा परिषद प्राथमिक शाळा येथे विशेष ग्रामसभेचे आयोजन करण्यात आले होते. ग्रामपंचायतीचे प्रशासक आणि श्रीगोंदा पंचायत समितीचे कृषी विस्तार अधिकारी दादासाहेब मांढरे यांच्या प्रमुख उपस्थितीमध्ये विशेष ग्रामसभा पार पडली.यावेळी कामगार तलाठी आकाश ढोरमले,ग्रामसेवक भाऊसाहेब गलांडे, माजी उपसरपंच दिलीप थेऊरकर, अनिल गव्हाणे,संतोष थेऊरकर, शशिकांत गव्हाणे,कांतीलाल गव्हाणे, सतिष गव्हाणे,शांताराम वीर,युवराज थेऊरकर,आप्पासो रसाळ,निलेश मांडगे,भानुदास शिंदे,गणपत मांडगे,उत्तम शिंदे,जयसिंग जगताप, जंबू गव्हाणे इत्यादी प्रमुख मान्यवर व परिसरातील ग्रामस्थ मोठ्या संख्येने उपस्थित होते.
दाणेवाडी(ता.श्रीगोंदा)येथील परिसरामध्ये बुधवारी(दि.१२)एका विहिरीमध्ये शिर,दोन हात व एक पाय नसलेले प्रेत आढळून आले होते तसेच येथून १९ वर्षाचा माऊली गव्हाणे हा तरुण युवक ६ मार्च पासून बेपत्ता आहे.त्याचाही शोध अ.नगर पोलिसांकडून अद्याप पर्यंत लागलेला नाही.त्यामुळे या दोन्ही घटना एकमेकांशी साधर्म्य असलेल्या घटना आहेत.दोन्ही घटनांचा शोध योग्य दिशेने होत नाही.असा आरोप संतप्त ग्रामस्थांनी ग्रामसभेमध्ये केला.
अन्यथा मंगळवारी पुणे-अ.नगर राष्ट्रीय महामार्गावर रास्ता रोको आंदोलन……
अहिल्यानगर पोलिसांनी दाणेवाडी येथील बेपत्ता युवकाचा शोध घ्यावा तसेच येथील विहिरीमध्ये सापडलेल्या मृतदेहाचा तपास योग्य दिशेने करावा व संबंधित दोन्ही घटनांचा छडा लावून क्रूरकर्म्यांना अटक करावी.अशा विविध मागण्यांसाठी मंगळवारी (दि.१७) सकाळी ११ वाजता संतप्त दाणेवाडी ग्रामस्थ व विविध संघटनांच्या वतीने शिरूर जवळील गव्हाणवाडी येथे पुणे-अ.नगर राष्ट्रीय महामार्गावर रास्ता रोको करून आंदोलन करण्यात येणार आहे.असा इशारा संतप्त ग्रामस्थांनी दिला आहे.
