Ahilyanagar : अहिल्यानगर जिल्ह्यातील संगमनेर तालुक्यात जवळे कडलग गावात शनिवारी संध्याकाळी एक फारच हृदयद्रावक घटना घडली. घराच्या दारात उभा असलेला चार वर्षांचा सिद्धेश कडलग या चिमुकल्यावर दबा धरून बसलेल्या बिबट्याने अचानक हल्ला केला. क्षणातच बिबट्याने मुलाला उचलून नेलं आणि त्यातच त्याचा मृत्यू झाला. (Ahilyanagar)
सिद्धेशचे वडील सूरज कडलग हे त्या वेळी गोठ्यात जनावरांना चारा टाकत होते. आजीही गवताचं ओझं घेऊन गोठ्यात गेली होती. घरासमोर मुलगा एकटाच उभा असल्याची संधी साधून, जवळच्या गवतामध्ये लपून बसलेल्या बिबट्याने झडप घातली. ही घटना कळताच संपूर्ण गाव हादरून गेलं.
चार वर्षांच्या चिमुकल्याचा असा दुर्दैवी मृत्यू झाल्याने गावकऱ्यांचा संताप अनावर झाला. “बिबट्याला ठार केल्याशिवाय आम्ही मुलाचा मृतदेह ताब्यात घेणार नाही,” अशी ठाम भूमिका कुटुंबीय आणि ग्रामस्थांनी घेतली. घटनेनंतर वनविभागाने रात्रभर परिसरात बिबट्याचा शोध सुरू ठेवला. गावकऱ्यांनी परिसरात एकापेक्षा जास्त बिबट्यांचा वावर असल्याचाही आरोप केला.
यानंतर शासनाने नरभक्षक बिबट्याला ठार मारण्याचे आदेश दिले. हे आदेश मिळाल्यानंतरच कुटुंबीयांनी सिद्धेशचा मृतदेह ताब्यात घेतला. अंत्यसंस्काराच्या वेळी वातावरण फारच शोकाकूल होतं. नातवाचा मृतदेह पाहताच आजीने हंबरडा फोडला, आणि ते दृश्य पाहून अनेकांचे डोळे पाणावले.
या घटनेमुळे संपूर्ण जवळे कडलग गाव सुन्न झालं आहे. सध्या वनविभागाकडून त्या नरभक्षक बिबट्याचा शोध सुरू आहे. तो कधी पकडला किंवा ठार केला जाणार, याकडे सगळ्यांचं लक्ष लागलं आहे.
दरम्यान, पुणे शहरातही काही ठिकाणी बिबट्या दिसल्याच्या चर्चा सुरू आहेत. खराडी परिसरातसुद्धा अशी माहिती मिळाल्यानंतर नागरिकांनी थेट पोलिसांना फोन केला. पोलिसांनी अफवांवर विश्वास न ठेवता, बिबट्या दिसल्यास तात्काळ कळवण्याचं आवाहन नागरिकांना केलं आहे.
